聰明使錢攻略!

By COSMO

Shopping當然開心,但如果因為一時衝動買咗好貴嘅嘢,冷靜落嚟嘅時候,典型嘅購物狂罪垢感就即刻浮現:究竟呢嚿錢真係使得啱?

下次購物狂心態湧現之前,不妨問問自己以下4條問題,讓自己冷靜一下,免得信用卡同情緒再次「大出血」。

問題一:呢樣嘢係咪實用?

當你走入舖頭,並即時被全新款嘅手機吸引住,好想即刻擁有佢。呢個時候不妨撫心自問:用幾千元買一部功能同自己而家嗰部相差無幾嘅手機,係咪真係值得?每次當你很想買「最」新鮮熱辣嘅潮物時,不妨退一步諗一諗,你究竟係咪真係需要吓吓換最新款?又或者一啲平少少嘅款式,但功能唔差太遠嘅,會唔會係另一個價錢合理啲嘅選擇?因為一年之後,你會後悔自己「成副身家」竟然嚴重貶值!通常,最潮的,跌價亦跌得最快,上網search一下你就會明白。

問題二:係咪成日心掛掛?

如果你去舖頭/網店「觀摩」心儀貨品嘅次數係好頻密,咁你一定係好鍾意佢。試想像下,有一日你再去到間舖時,發現件貨已經俾人買咗,如果咁會令你失落成個月嘅話,咁你可以考慮吓買落嚟。

問題三:呢樣嘢嘅平均使用成本係幾多?

首先,千祈唔好因為要慳錢買嘢而唔食飯!喺你打算買一件貴價貨嘅時候,不妨利用少少數學知識嚟幫你做決定:將貨品嘅價格除以你打算使用或穿著佢嘅次數。例如你打算將條值$1,500嘅洗水牛王最少著100次,咁每次嘅使用成本就係$15,都算買得過。但係如果你諗住買個幾萬嘅名牌手袋,除咗出席公司annual dinner同去飲外,就無其他場合可揹嘅話,就不如考慮下較平嘅選擇啦。

問題四:係咪貴到唔敢話俾人聽?

如果你擔心阿媽/男友責怪你亂使錢,又或者你自己都覺得唔好意思講買咗幾多錢嘅話,咁呢件物品對你情緒嘅影響似乎大過佢嘅價值。不過,如果你覺得佢會令你更有自信,或者你會因為擁有呢件超級有型嘅物品而變得超級勁滿足的話,咁你就唔需理會別人的想法。如果只是偶爾一次嘅小獎勵,實在不應令自己過分內疚。

CG! Tips

記住記住!精明的女生懂得量入為出,適量嘅shopping係可以嘅,但如果為咗一時嘅購物慾而剝爆卡或者先使未來錢,就非常不智!

 

LOAD MORE