煲劇破壞情侶關係,點算?

by Ella

 
男生成日投訴女友掛住煲劇,情況就好似女生唔鍾意男友終日打機/睇波一樣(受呢方面困擾嘅CG!可以參考:對付男友沉迷玩樂的4大方法!)。但究竟點解男生咁「鄙視」煲劇呢件事呢?原因有幾個:
 
1. 感覺老土:好多無睇開劇嘅男生對劇集嘅槪念仲停留喺10年前,你一話煲劇(尤其是韓劇!),佢只會諗到《天國的階梯》集集喊+主角患癌等等粵語長片情節。
 
2. 浪費時間:話明係「煲」劇,當然要花唔少時間,一套劇閒閒地都有廿幾三十集,佢唔明點解要浪費時間喺呢方面,寧願瞓多幾個鐘。
 
3. 妒忌心作祟:好多劇集(尤其是係韓劇again!)嘅男主角都係「高富帥」,甚至係完美嘅外星人,迷倒唔少女生,男友覺得自己地位受威脅,自然唔鍾意啦!
 
唔想因為煲劇影響同男友嘅關係,你就要着手同佢溝通多啲:
 
1. 導佢入局:唔想男友話你,最有效嘅方法一定係令佢同你一齊「中毒」。遇上好睇嘅劇,介紹男友一齊睇,開頭可能佢會抗拒,但發現好睇之處嘅話,分分鐘佢會比你更加入迷。(好似真人真事:「輕熟女‧看男女:迷上星星的他」咁!)
 
2. 等價交換:你鍾意煲劇嘅同時,佢都可能沉迷喺打機、踢波等等,你哋兩個不妨訂立一個協議,你唔會再嫌佢掛住打機,佢亦都唔可以再因為你煲劇而話你。其實各自有唔同節目,都未嘗唔係一件好事!
 
3. 令佢安心:睇劇睇到中晒毒嘅同時,都要幫男友打返支「強心針」,例如興奮咁同朋友傾完男主角幾靚仔幾深情之後,都要同喺隔離嘅佢補返句:「不過喺我心目中都係你最好。」等佢條氣順返。
 
LOAD MORE