愛上好友的前度……

by Jan

曾經聽過有女仔鍾意咗好朋友嘅前度,但基於怕無咗個好友,亦怕周圍嘅人閒言閒語,一直都唔敢同個男仔開始拍拖。究竟如果遇到呢個情況,係咪真係要眼白白咁送走一段戀情呢?

1. 不是第三者

最重要嘅一點,就係你唔係第三者,好友同佢前度嘅分開並唔係因為你。如果你哋本身清白,只係喺佢哋分開咗之後先開始鍾意對方,雙方都係單身,咁你就唔係橫刀奪愛,並無破壞人哋感情,唔需要太有壓力。

2. 好友仍否有留戀?

要知道好友仲有無對呢位前度有留戀,同樣亦要知道呢個男人對你嘅好友有無留戀,如果確定雙方都無留戀,基本上佢哋已經無任何愛情上嘅關係,你亦唔使太擔心,可以嘗試慢慢同呢個男人發展。

3. 適當時候先一齊

即使男人同好友分咗手,你哋又火速戀上,都唔使咁快一齊,等時間將佢哋分手嘅事丟淡啲,同時你哋兩個亦可以慢慢了解下對方,到時機成熟,一切都ready嘅時候先一齊。到時可能好友唔會介意,認為同呢個男人分咗手之後,對方對佢嚟講只係一個普通人/朋友,如果佢同你真係好朋友,佢會祝福你。

4. 自我心態調整
你作為佢嘅好友,可能都好清楚佢同呢位「前度」嘅往事,如果你真係同佢嘅前度撻着咗,就唔好介懷太多呢啲過去嘅事。當然,你要有心理準備,如果你同咗呢個男人一齊,將來都有機會同好友同場出現,或者會有尷尬情況,甚至佢哋可能親密少少都會令你妒忌(假設佢哋做得返朋友)。

LOAD MORE