同男友外遊DOs & DON’Ts!

by 斑比

香港地方細細,講真拍拖地點嚟嚟去去都係嗰幾個,男友要諗新地方都幾頭痛,去外地拍拖,除咗有新鮮感之外,仲可以透過親密相處,响日對夜對嗰幾日對佢了解更深;當然,發掘到嘅係好定壞,就視乎你同佢點相處喇。

1.  DO! 遷就對方互相尊重

尊重對方嘅旅遊喜好,男仔一般都對行街買嘢唔太熱衷,如果女仔編到成個行程都以shopping為主,仲要逼男友全程陪住自己,可能就會聽到「平時香港仲買唔夠咩?」、「喂,呢件你咪有囉!」、「嘩,你有幾多塊面呀?」嘅說話,好容易就會不歡而散。所以事前大家應該諗下有無啲咩地方適合兩個一齊去,假如女仔要去血拼,都可以體貼咁叫男友去附近睇吓有無咩行,然後相約一個時間地點會合,咁當然,人在異地失散左好煩嘅,所以千祈唔好遲到。

2.  DO! 關懷體貼 感情升溫

去到外地旅行,人生路不熟,你只有佢,佢只有你,你都可以趁機會表現出你成熟同體貼嘅一面。加上兩個人在陌生地方互相扶持,大家一齊經歷旅途中的點滴,感情自然會鞏固咗,仲有機會邁進一大步添!

3.  DON’T! 肉麻情侶舉動

有些香港人拍拖情到濃時會喺公眾地方攬攬錫錫,搭緊扶手電梯咁短時間都要嚟個高低kiss,但外地文化唔同,尤其一啲較保守嘅國家仲可能會令其他人難堪。筆者都試過聽日本朋友話在街頭見到人樹熊咁又攬又錫會好尷尬,所以最好都係考慮一下是次trip你們要不要「入鄉隨俗」一下。

4.  DON’T! 公主病發作

喺香港或者你好鍾意叫男友幫你拎手袋或食你口水尾,但難得旅行,其實男仔都好想借呢個機會唞唞,享受吓異國風光。所以女仔唔好迷路時就怪男友無用,過度勞役男友,當佢阿四咁,以為外地無人識就乜公主病都出晒嚟,問路又次次推佢出去問,講真男人嘅「樽鹽」好容易咁就俾你粉碎咗!

 

LOAD MORE