第一次重要嗎?

by Miss Sex

Dear Miss Sex,

第一次重要嗎?

由細到大都被灌輸一個觀念,就係第一次好重要,如果無咗,第時結婚就會無幸福。所以即使拍拖時,同另一半就算幾想做都忍住了。

一年度,終於喺情不自禁下發生咗,但自己事後好自責,覺得自己唔識潔身自愛,覺得自己做得好錯,仲會覺得自己好污穢,會俾將來老公嫌棄。

男人係咪咁重視女人的第一次?

迷茫的人上

Dear Lady Lost,

問男人係咪重視女人的第一次,正如問女人係咪重視男人的經濟能力,好理想咁諗,都係嘅……不過現實歸現實,遇上對的人,心思通透的人會覺得呢啲外在嘢唔係最重要,因為男人最終想要的係幸福,而唔係嗰塊膜。

女孩子細細個就被灌輸一旦失身,就會被打入十八層地獄,因為前輩以至整個社會,都認為有責任保護無知少女,免她們被男仔呃。

不過,如果你已經大個女,就可以為自己做決定,你説情不自禁下做了,即憑自己的自由意志去做,又有甚麼錯呢?

而且,你應該學會獨立思考,「無咗第一次結婚就會無幸福」?Jessica Simpson嫁俾Nick Lachey時也聲稱是處女之身,不過兩人咪一樣離婚。威廉王子母親戴安娜王妃的悲劇你知道吧?所以呢句嘢只係靠嚇。

Miss Sex好老實咁講,社會對女人「潔身自愛」的定義是有期限的,這個term或許適用於十八廿二的年輕女子,但過了一定年紀,女人還「潔身自愛」,坊間會用好多難聽的labels去形容她們,女人吓吓在意其他人點諗就死得了,所以你無謂嘥精力去自責。

過去的由它過去,你應該花精力做的,是經營好將來的自己,做個未來老公會錫到你燶的女人。這可是深厚的底子工夫,慢慢努力。

另外,請幫Miss Sex一個忙,不要再將性與污穢連繫在一起了,Miss Sex多年來嘔心瀝血誘導女人好好享受性,如果仍有讀者這樣想是會傷透我心的。Please。

祝幸福。

Xoxo,
Miss Sex

LOAD MORE