令他享受戀愛的4個小錦囊!

By COSMO

好多女生都有咁嘅經歷:俾佢熱烈追求,度過快樂嘅蜜月期後,感情啱啱開始穩定落嚟,佢就有啲怪怪地,冷漠,甚至疏離。撇除「新鮮感」嘅因素,導致男性如此奇怪嘅其一原因,就係佢嘅「單身情意結」。當佢開始認真投入一段關係中時,佢可能覺得單身時嘅自主權在一點一滴地消失,要適應成個過程,對佢嚟講並唔容易。

作為佢嘅女朋友,你嘅耐心同幫助絕對能令他適應得更好,只要避免做出以下男性認為「可怕」嘅事情,你哋嘅戀愛關係會變得更順利。

可怕事件簿1:經常將「我哋」掛喺口邊

男生開始一段關係時,極可能仍停留在單身時期嘅心態,於是當佢聽到你話「我哋」嘅時候,佢會立刻被「提醒」佢已經唔再單身。除此之外,佢哋會認為「我哋」隱含住「我已成為你嘅附屬品」嘅意思,更會聯想到你將會代表「我哋」嚟思想、行動,全權將佢控制喺掌心之上,呢個係男性最怕嘅事。

解決方法:

已成為情侶嘅你哋,當然唔可以避免用「我哋」,但嘗試讓男友覺得當你講「我哋」時,你嘅意思是將你同佢睇成一個組合,邊個都唔附屬邊個。例如,當你想話「我哋weekend去邊度玩」時,試試咁樣講:「如果我哋weekend去睇戲可能幾好玩,你覺得呢」。當你邀請男友一齊做決定時,佢就唔會覺得你想控制佢。不過,拍拖初期都係唔好成日將「我哋」掛喺口邊,等他適應一段時間後,甚至連佢都慣咗講「我哋」時,你就知道你哋嘅感情真正穩定下來了。

可怕事件簿2:同佢嘅死黨發生爭執

當你同佢嘅關係穩定咗,佢會開始將你介紹俾佢嘅死黨認識。或者佢嘅交友口味同你好唔同,你睇佢啲朋友唔係好順眼,甚至有時仲同佢哋發生爭執。當你同男友嘅朋友不和時,佢絕對會好似一部hang咗嘅電腦咁樣,完全唔知點做──佢唔知道自己係咪要「選擇立場」,更唔知道你會否要求他同死黨絕交。男人,最怕呢種「唔知點算好」嘅矛盾局面。

解決方法:

要知道,女友同死黨喺男人心目中都好重要,「手掌係肉,手背又係肉」,如果你堅持同佢嘅死黨不和,甚至要佢作出「選擇」,男人極可能選擇唔要你,以求即時擺平極度緊張嘅局面,還原他原來的生活生態,是最快捷的方法。做人女友,都唔代表惡晒,最好同佢嘅死黨保持君子之交or點頭之交;如果曾經爭執過,就盡快讓件事過去,唔好令男友覺得左右為難。

可怕事件簿3:突然提出同居

好多感情穩定嘅情侶過咗一段日子後,腦入面會萌生同居嘅念頭。不過,好多男人想還想,付諸行動又係另一回事。如果你喺佢毫無防備時提出同居嘅要求,佢除咗覺得非常突然,仲可能聯想到好多唔同後果,例如你下一步會唔會要控制佢嘅生活、財產,然後仲要買樓俾你、結婚……諗到呢度,可能佢會驚驚……

解決方法:

同居唔係食餐飯咁簡單,雙方都需要心理準備好先能夠付諸實行,所以,開始時可以輕描淡寫咁同佢講,你嘅一位朋友決定同男友同居,睇吓佢有咩反應。如果反應唔太正面,就將話題放埋一邊,或者稍為試探一下他唔鍾意同居嘅原因。如果反應良好,你就可以試下提出要求,不過,為咗令大家輕鬆啲,不妨訂下一個「試驗期」。當佢知道同你同居並唔係一個無得逆轉嘅決定,而係一個「暫時性」嘅安排,如果大家感覺良好嘅話先繼續,咁佢就唔會有「同居生活失敗=分手」嘅重大壓力。

可怕事件簿4:貼身追擊

或者你哋無同居亦未計劃結婚,但你哋嘅關係已經好成熟,於是,你開始將佢視為家人──一個毫無私隱、奉旨喺你面前將一切表露無遺嘅人。每天定時打俾你「報到」係例行動作,如做漏咗必會收到你嘅奪命追魂call;查看佢手機裏嘅通話紀錄、WhatsApp、電郵;盤問佢朋友有無喺某夜一齊睇波,以證實男友嘅口供確實無誤。呢一切一切,在你睇嚟係「關心」同「緊張」佢,但只會令男人產生一種想法:盡快離開你。(可參考:Check 男友手機真係有用?

解決方法:

佢唔想你check佢部電話,並不一定代表他做咗對唔住你嘅事,而係佢想保留一啲屬於自己嘅空間。如果你真係好想知道佢唔同你一齊時嘅事情,可以用分享形式表達,例如你先講自己嘅事,然後等佢回應、分享。不過,無論如何,學懂尊重對方嘅個人私隱,承認對方擁有一定嘅私人空間,係一段成熟關係入面嘅must-have相處方法。

LOAD MORE