拜年要注意的7大事項!

by Jan

下星期就係農曆新年,相信好多人都要四出拜年,要知道好多長輩好重視呢個節日,所以拜年時記住要留意以下事項:

  1. 盡量唔好著到成身都係黑色,即使你著咗黑色衫,都起碼配搭一啲鮮色嘅小物,例如紅色頸巾或紅色手袋,因為有啲思想較為傳統嘅長輩會覺得大時大節著到黑沉沉唔係咁吉利。
     
  2. 如果要去一啲唔係咁熟嘅親戚度拜年,應事先了解一下將會見嘅人要點稱呼,唔好到時叫錯人。
     
  3. 同長輩拜年,吉利說話要講得合宜,對住唔同嘅人,應該有唔同嘅祝賀語。而且講說話要小心,唔好開口「目及」着脷講埋啲唔吉利嘅說話。
     
  4. 新年期間,如果打電話俾長輩,第一句應該禮貌地同對方講聲「恭喜發財」先,然後再入正題。
     
  5. 去到人屋企,唔好即刻問人拎Wi-fi 密碼,應該講完祝賀說話,寒暄完一輪先問,如果唔係會顯得你好無禮貌。
     
  6. 喺人哋屋企要小心唔好打爛嘢,雖然可能主人家會話「唔緊要,落地開花富貴榮華!」,不過始終都唔係幾好啊!
     
  7. 去朋友/平輩屋企拜年,即使大家好friend都好,都唔應該兩手空空咁上去,記住點都要買盒賀年禮品啊!
LOAD MORE