直擊!海港城朱古力之旅

by Cynthia

鍾意食朱古力的人有福了!點解?因為海港城最近有個Chocolate Trail「情.尋朱古力」活動,集合咗超過20間全球殿堂級朱古力店,部分更係首度來港或者平時香港買唔到嘅品牌!今年海港城仲特別以「Romance is everything」為題,由2014年1月13日至2月16日,於場內不同地方設置各有特色的朱古力主題裝置及舉行「朱古力幻想曲」藝術展。就等我為大家重點推介唔可以錯過嘅甜品店!

第一站:最貴氣!BVLGARI pop-up store

當聽到BVLGARI嚟香港開呢間IL CIOCCOLATO朱古力pop-up store,心情真係好興奮,因為而家唔使去日本都可以買到BVLGARI朱古力啦!去到海港城嘅 counter,一粒粒朱古力都好似珠寶咁,連個朱古力盒都好似珠寶盒咁貴氣,真係好吸引呢!

當中最特別係兩個特別為香港pop-up store推出嘅限定口味:「松露巧克力及咖啡」以及「栗子及綠茶」,價錢都一樣矜貴,要成$120一粒!另外pop-up store亦會供應其他口味嘅朱古力,好似黑胡椒白松露巧克力、西西里開心果配海鹽焦糖、薰衣草香橙花蜜糖等等,各有特式,價錢由$30起,都唔算太貴啊!

第二站:印象難忘!多重口感的法國朱古力Chapon

呢個來自法國嘅朱古力品牌Chapon,平時喺香港係買唔到架,上年進駐過海港城「情.尋朱古力」之後,今年再度來港,好受歡迎。

當中最特別係「金爍煙燻鹽果仁朱古力」,內有3種唔同嘅果仁,到最後會食到鹽味,好有層次感!到而家都有啲掛住佢嘅味道呢!另外,彩繪朱古力,仲有鐵塔造型嘅包裝盒都好靚,送禮一流。

第三站:初嘗羅勒味朱古力!來自比利時的Frederic Blondeel

其實朱古力嘅變化真係可以好多,好似羅勒味嘅朱古力,真係第一次食!來自比利時嘅Frederic Blondeel,係第一次登陸香港。佢最特別嘅地方係有成40幾款朱古力選擇,當中有好多特別味道嘅朱古力,好似羅勒、四川胡椒、辣椒、茉莉花等。

試羅勒味朱古力時,第一啖咬落去就食到好清新嘅羅勒香味,好有新鮮感,辣椒味朱古力都好得意,唔會好辣,係食到最尾會feel到喉嚨有辣辣地嘅感覺。佢哋嘅朱古力全部都係人手製作,香港店所有朱古力均由比利時新鮮空運到港。

第四站:Ice Cream Gallery超像真的白松露雪糕

Ice Cream Gallery顧名思義就有好多唔同味道嘅雪糕,全部都用原材料製作,唔加人造色素同香料,就連糖都無加!其中最特別嘅味道一定係 白松露,第一啖食落去,嘩!完全係香濃嘅白松露味道,好好味。我仲試埋龍蝦味,一食,只能夠形容個味道好「龍蝦」,真係第一次食呢啲味道嘅雪糕。佢仲有個「煙燻海鹽朱古力雪糕」,真係用煙燻過,味道好有層次。

除咗雪糕之外,Ice Cream Gallery仲有朱古力同咖啡賣架,咖啡朱古力個味好香濃,唔錯!

第五站:來自新加坡的精美cupcake

鍾意食cupcake嘅朋友,就唔可以錯呢間來自新加坡嘅twelve cupcakes,佢賣嘅cupcake全部都好靚,當中仲有3個款式係海港城先買到,當中嘅棉花糖軟心朱古力cupcake,內有香濃朱古力醬、棉花糖、朱古力忌廉芝士,再配軟心朱古力蛋榚,朱古力迷一定會好鍾意!

同場加映:朱古力主題裝飾

除咗朱古力店之外,海港城亦配合主題放置咗好多朱古力藝術品,好似用朱古力整成嘅手袋、高踭鞋、飾物等等,地下亦有立體繪畫俾大家企喺上面影相!

LOAD MORE