必讀!情侶相處之道

by Chris

各位CG! 仲記唔記得12月31號同男朋友倒數嘅甜蜜時刻呢?同最愛嘅人一齊跨越 2013/14 就註定一生一世?邊有咁易!與其信埋呢啲嘢,不如參考吓下面嘅情侶相處之道仲好!

1. 要有鬧交的準備!

Sweet嘅時候相處當然好容易,但點樣處理吵架情況,其實好多熱戀中嘅情侶都無諗過!例如當兩個人都着晒火嘅時候,你哋係咪都識得停一停,吞咗啲 hurt人嘅說話,暫時分開一陣,再對事不對人諗下點解決問題呢?關於嗌交問題,可以參考:Stop嗌交攻略!

2. 你食住佢?佢食住你?

有時鬥下嘴或者會係一種情趣,但如果每次都係為咗啖氣,拗輸咗就唔忿氣,關係點會好?另外,唔好為咗喺段關係裏面佔上風,就 set好多對方未必鍾意嘅rules出嚟,對方唔做就覺得佢唔愛你,例如每日要同佢講一兩個鐘頭電話,又或者要佢放假時將所有時間愛心全奉獻晒俾你。兩個人相愛,最重要係互相愛惜、尊重,而唔係講聽唔聽話。

3. 浪漫亦要有空間

難得放假,當你煲緊劇煲到變咗「宅女」唔想郁嘅時候,如果你男朋友不斷叫你做呢樣做嗰樣,你一定覺得不爽啦!又或者你搽緊指甲油,搽到一半男朋友就拉你出街,你唔發火就奇!同樣道理,無論佢專心打緊機、去搵朋友睇波、定係忙緊公司嘢,都唔鍾意有人騷擾。再者,當佢想專心做一樣嘢,但又擔心唔睬你你會嬲,佢都好難專心一志。倒不如事前分配好拍拖同私人時間,佢有佢嘅私人空間,你亦可以約下姊妹去食afternoon tea或者一齊做 facial,時間分配得好自然少磨擦!

4. 切忌嚴密防守男朋友!

「我唔准佢同其他女仔WhatsApp架,Facebook add 咗啲咩女仔我一定要睇,佢同一班人食飯如果有女仔在場我一定要去!」你以為咁樣就可以「抵抗外敵」令男朋友乖乖留喺你身邊?恐怕佢捱唔到幾耐就想自行出走!點解?因為人係需要自由同被信任架囉。坦白講,成日check住人哋,都好攰下,同埋容易引致神經衰弱,何苦呢?如果你真係唔check唔安樂的類型,不妨參閱呢篇文:Check男友手機真係有用?

5. 為對方提供正能量

每一對情侶都會有獨一無二嘅magic moment,每一段關係亦會有過唔愉快嘅經歷,但講到底,兩個人一齊嘅目的都係為咗開心。無論你學業有幾大壓力,或者返工受咗幾多氣,拍拖時最好將負能量放埋一邊,千祈唔好拎對方做出氣袋!如果你真係好唔開心,可以同佢呻吓,借佢耳朵抒發一下,唔好以為對方唔明就唔講,如果佢唔知你發咩脾氣,咪仲難受!又或者係你唔知佢為乜唔開心,有時一個簡單嘅擁抱,等佢自己冷靜一下都已經係最好嘅 support!愛情上面,負負好難會得正,唯有正能量碰上正能量先真正可以「1314」!

LOAD MORE