8款眼線產品大比併!

by 韋寶

之前CG!網編Karen C.教過大家如何畫出一條美美嘅眼線(詳情:用眼線勾出低調的眼尾!),然後就有好多讀者問到底邊隻眼線好用,所以今次我就搵咗8款眼線嚟測試,等大家可以搵出心水嘅眼線產品!

Za持久眼線液Liquid Eyeliner $95

持久度:★★★★☆(4星半)
易畫度:★★★★☆
易卸度:★★★★☆
出色度:★★★★☆
 
總評:
呢次係我第一次試Za嘅眼線,感覺都幾驚喜,因為我常有溶眼線的問題,唔係隻隻都用到,不過呢隻keep到一日之餘,用BIODERMA已經卸到!

 
BY TERRY Crayon Khol Terrybly $355
持久度:★★★☆☆ 
易畫度:★★★★☆
易卸度:★★★★☆
出色度:★★★★☆

總評:
可用作眼線筆或眼影筆,共有3種顏色,包括啡色、綠色及藍色。是次所試嘅係啡色,其筆觸順滑非常,而且頗上色,唯到下午有少許暈染嘅情況出現。
Kiss Me Heroine Make纖細眼線液 / $75
持久度:★★★★☆(4星半) 
易畫度:★★★★☆ 
易卸度:★★★★★ 
出色度:★★★★☆
 
總評:
Kiss Me嘅眼線液一向都好評如潮,一試之下,果然係唔錯,既易畫又快乾,而且經過一整日都唔會溶,仲要用溫水就可以卸除喇!
 
COLLECTION鑽石時尚派對眼線筆 $59
持久度:★★★☆☆ (3星半) 
易畫度:★★★☆☆ 
易卸度:★★★☆☆ 
閃爍度:★★★★☆
 
總評:
呢支眼線液我間唔中都會用,因為佢入面有啲閃爍微粒,睇上去閃令令很漂亮。至於缺點呢,就係其筆尖雖然頗幼細,但由於含有閃粉嘅關係,故此較難搽勻,而且眼尾到下午會化開。不過由於佢真係閃得好靚,有次同事仲話:嘩你個眼線閃架喎,而且價錢好平,所以我都覺得值得入手。 
此外,呢款眼線液有14種色調可選,如閃紫、閃粉藍及閃金黑等。 
 
銷售點:指定屈臣氐專櫃、指定MAPLE專櫃及指定Citysuper / LogOn專櫃發售
L’Oréal Paris極黑持久眼線  $99
持久度:★★★★☆ 
易畫度:★★★★☆ 
易卸度:★★★★☆  
出色度:★★★★★
 
總評:
佢嘅出色度有如其名,的確係極黑同埋頗持久,經過一日都無乜點甩!筆尖唔係屬於好幼嗰種,但對於我呢啲鍾意畫翹起眼尾嘅人就好方便,畫兩下已經畫好,所以呢支都係我「常用眼線團隊」嘅其中一員。
 
Etude House Oh My Eyeliner $38 
持久度:★★★★☆ (4星半) 
易畫度:★★★★☆ 
易卸度:★★★★☆ 
出色度:★★★★★
 
總評:
顏色夠實淨、快乾又貼服,經過一整天都唔會有暈染嘅情況,而且卸妝嗰陣啲眼線液會一粒粒咁甩出嚟,好易卸,唯一缺點係氣味較濃。不過以$38嘅價錢有呢個質素,真係超抵用呀!
ettusais柔滑防水眼線筆 $115
持久度:★★★☆☆ 
易畫度:★★★★☆ 
易卸度:★★★☆☆ (3星半) 
出色度:★★★☆☆ (3星半)
 
總評:
內含旋轉筆芯,唔使刨夠方便,易畫之餘亦夠顯色,不過到下午時分就開始溶,尤其眼尾位甩得較厲害。
 
銷售點:全線 JOYCE BEAUTY 發售
 
Maybelline New York Hyper Sharp Laser Precision Liner $85
持久度:★★★★☆(4星半) 
易畫度:★★★★☆ 
易卸度:★★★★☆ 
出色度:★★★★☆
 
總評:
呢支眼線係我哋編輯部一致公認好用嘅眼線,唔甩之餘又好快乾、易畫,而且佢嘅色澤自然又易卸,所以我由佢上一代用到而家啦!仲有仲有,佢只須用潔面乳清洗就可以卸除喇!
 

Tips

1. 經常有讀者問到底邊種眼線最持久,根據CG!編輯部嘅經驗,最唔易甩嘅係眼線液,其次係眼線gel。

2. 始終每個人嘅膚質同眼形都唔同,如果你想參考更多意見,可參閱「編輯分享:好用眼線產品推介!」及「讀者分享:4款好用眼線推介!

3. 畫眼線有好多方法,如果你想畫得更靚,可以睇睇「讀者分享:初學+進階眼線畫法」!

 

LOAD MORE