拍拖後男友變得冷淡,點算?

By COSMO

Hi Joven:

我真心好希望你可以解答到我!其實我同我男朋友識咗一個月左右就一齊咗,一大堆人出過去兩次,單獨出街一次就一齊咗,到而家差不多兩個月了,初時我完全無諗過會同呢個人喺埋一齊,亦無諗過自己會鍾意佢,更加無諗過我會越愛越深。

喺佢追我嘅時候,我哋由朝到晚都WhatsApp,好多時佢都會主動搵我,而喺拍拖頭一個星期,大家都相處得好開心,但到咗第二個星期,佢冷淡咗好多,後來知道原因係佢個EX WhatsApp過佢。佢話佢唔知自己想點,就算到而家,雖然佢好認真咁答過我,而家愛嘅係我,諗清楚同EX只係朋友,無可能再喺返埋一齊,但基於我曾經有不愉快經歷,我好擔心案件重演,令焦慮症嚴重咗,晚晚都會發惡夢,搞到日日都好唔精神。

佢個EX真係令我極之困擾,有晚我見到我男友like咗佢FB一張相,我已經自己喺屋企啜泣,我都覺得我好似over咗,但係我控制唔到嗰刻嘅反應。 同埋一齊咗之後,雖然晚晚都會傾電話1-2小時,但WhatsApp數量大降,而我哋一直見面只係一星期一次,我覺得點解好似我哋無熱戀期咁,我分分秒秒都諗住佢,但我覺得佢無,令我覺得好辛苦。但每次只要佢有回覆或者喺電話聽到佢把聲,我個心就會踏實得多。

我知道男人對容易得到嘅野,係唔會珍惜,我有試過控制自己唔搵佢,但每次都失敗。點解我會成日想見想搵,但佢好似會嫌多咁,愛一個人唔係會成日想見到對方,想知對方做緊乜架咩? 最近兩晚,輕輕討論過兩個問題,雖然好似無乜野,但其實一直拮住響個心度。

第一個問題係,佢話佢冷淡咗係因為我同佢追緊我嘅時候,好似兩個好唔同嘅人咁,一齊咗之後覺得我好細路女,甚至有啲kai,佢的確用個kai字嚟形容。咁講真,同佢一齊後,我都覺得佢比一齊前係幼稚咗,同無咁細心。我覺得我哋玩嘅性格上係夾,但相處方式好似仍未磨合到。我可以點做?

第二個問題係,佢覺得佢想AA制。帶出呢個問題前,係因為有幾次,佢成日都叫我請佢食呢樣,請佢食嗰樣,而我亦唔係介意AA制,雖然我自己家境大不如前,我亦好明白事理,佢屋企同佢本身又唔係好有錢,我哋大家又都係啱啱出嚟做嘢2、3年,我體諒,但我知道佢對個EX係佢比哂,所以我會有啲心理不平衡。佢係咪唔夠愛我,所以唔想花錢喺我身上?唔想照顧我?

最後仲有一個問題係我無同佢討論過,但內心好掙扎。我覺得佢係一個唔太儲到錢嘅人,我怕我地會無將來,無幸福,話說我都25歲了,而佢仲細我2年。

我呢一刻係好愛佢,但我怕我會錯過一個更加對嘅Mr Right,又或者我會遇到Mr Right而放棄佢,我唔想傷害到佢。其實我成日督促佢,佢可能覺得我煩或者要求高,但其實我只係想大家可以長久啲,我可以用乜方法表達比佢知而唔傷佢自尊心?

Wing Yee

Dear Wing Yee:

首先,我想清楚,你提及的焦慮症,是經醫生診斷的嗎?如果是的話,你最好去找醫生求助。

假設你並沒有患上焦慮症,我想你明白,即使是拍拖很多年的情侶,也不一定能結婚,再加上你們還年輕,對Mr/Miss Right的要求會隨人生閱歷改變,所以你對他不能儲錢,會不會錯過Mr Right等問題是十分多餘的。

我明白,男友前度的某程度上會對現感情造成困擾,不過除了那個FB Like之外,你還察覺到他和她有舊情復熾的跡象嗎?疑心生暗鬼只能靠自救,無人幫到你!

我一向反對大家看坊間那些無水準的愛情小說,或者真人show,然後誤信「男人對容易得到嘅野,係唔會珍惜。」這句鬼說話。是否得到男人的珍惜,不在乎你是否易得到手,而是你有甚麼事令他珍惜你。而你為甚麼會給人易得到手的感覺,跟你的自尊和自我價值有莫大的關係!!!

而追求和拍拖後變成兩個人,可以是拍拖後,他覺得大家還是合不來,所以開始冷淡。也可以是,戀人無法永遠keep住熱戀期的興奮,學習日常相處,面對實際生活才能令關係長久。

而你呢?你自己有無變先?

By the way,小姐,每晚可以傾一、兩個小時電話,其實已經好sweet,都已經傾了兩個鐘,WhatsApp減少有幾奇呢?每一晚你真的有這麼多要講嗎?

最後,在你投訴他的時候,你有沒有在對方的立場想想?

最最後,我唔贊成用AA制去衡量他愛你,還是前度多些,不過如果你覺得被搵笨,咪唔好同佢出街,齋傾電話算囉。

CG!們,如果你在生活上遇到甚麼疑難,包括工作、愛情、人際關係,總之生活上的任何事情,都歡迎e-mail到editorial@cosmogirl.com.hk 跟我分享及討論啊!:)(Subject: ask joven)

歡迎加入Joven Love  ♥  Life Coaching Fan page

Joven's Blog - 30 Minute Love Affair

Love

LOAD MORE