貼心川菜館:雲陽

by 韋寶


之前去咗川菜館雲陽試菜,我本身一見到係川菜館,都驚食物會好辣,但呢度個menu係非常貼心咁分咗辣同唔辣嘅菜式,啱晒我呢啲怕辣之人!
未試菜之前,先嚟咗杯豆腐奶昔($34 ),一飲之下,不得了,豆腐味好香濃,而且又唔會好漏,非常讚!
 
而菜式方面,有好多款都好好味,好似搖滾菌油牛舌粒($78),個牛脷整得又腍又入味,原來佢嘅製作方式係好似cocktail咁,將雞尾酒壺內嘅牛舌粒同自家製野菌油搖勻,所以咁入味,呢個真係一定要試呀!
另一推介係雲腰芙蓉雞片($108),入面嘅蛋白做得好滑溜;
豆酥桂魚($164 半條)一上臺已經好香,滑溜溜嘅桂魚加上酥香嘅豆酥,的確幾滋味;
金銀風肉煎年糕($108)嘅年糕煎得非常香脆,令人食唔停口;
醬爆肉($98)個汁惹味非常;
八味豆腦($88)有得食又有得玩,入面有八款唔同嘅配料,可以將花椒及辣椒等放入碗內舂碎,然後拌上店家嘅自家製豆腐進食!而金獎泡椒年糕蟹($448)雖然我當日無試,不過賣相真係好吸引,所以都介紹俾大家!
 
甜品方面,真係幾驚喜架!當日我試咗四川花椒雪糕($ 48 )同豆腦焦糖布丁($38),前者喺雲呢拿味當中夾雜住花椒嘅香味,花椒味唔會太搶,好特別,而後者真係有豆腦嘅味道,比起平時嘅焦糖布丁感覺清啲,在場嘅記者們都好鍾意呢!

地址:銅鑼灣勿地臣街1號時代廣場10樓1001B號舖
電話:2375 0800
 
LOAD MORE