情侶間4樣最唔應該送嘅禮物!

by 斑比

 
佳節往往係情侶間嘅送禮良機!拍拖頭一兩年,可能都會為咗博取好感,費盡心機大灑金錢,未好了解對方喜好嘅話,送一啲大路嘢就實無死,送俾女嘅通常係花、朱古力、首飾呢啲,送俾男呢,就可能係手表、領帶、頸巾(親手織或買返嚟但話自己織,哈哈)。講真雖然安全穩陣,但就一啲驚喜都無。
 
先唔講送咩好,以下幾項就絕對係禮物嘅大忌喇:

1. 情侶裝:我知好多女仔都好鍾意逼男朋友著情侶衫戴情侶表情侶鍊,但你估個個都想做Kitty同Daniel咩。你睇沈旭暉結婚公仔都用叮噹襯吉蒂,兩種「貓科」生物互相尊重,咁先係perfect match架嘛!





2. 手機殼:首先,送手機殼唔多唔少有啲求其無誠意(除非對方真係好鍾意嗰個brand/圖案),其次係手機係一樣幾乎日日每分每秒都拎住嘅嘢,鍾意就當然好,但唔鍾意就好痛苦喇,用又唔係,唔用又無得隱瞞。而且到換手機時個殼就變咗無用,你知啦,而家啲smartphone平均壽命唔係好長……
 
3. 團購禮物:千祈唔好喺紀念日、生日、聖誕、情人節呢啲日子買團購嘅禮物或餐飲,因為團購貨品質素參差,响呢啲重要日子都係穩陣啲好,除非你想佳節嗌交無回頭。

 
 
4. 任何瘦身做Gym瑜珈脫毛運動療程:自己話自己「好肥呀!」就得,俾身邊人明示你俾埋錢去做就十萬個NO!一定嬲爆,等於喺份禮物上寫住「唔該減下肥啦」、「你毛髮好旺盛喎」,試問邊有女仔鍾意呢?
 
其實呢,老土啲都要講句,送禮都係想表達心意,而唔係俾對方壓力同束縛。多啲留意下佢嘅FB、Instagram,睇吓佢需要啲乜,自然會有頭緒搵到啱佢嘅禮物。根據非正式統計,手作仔永遠都係最冧嘅禮物,如果兩個一齊整,就更加sweet sweet啦!詳情可以參考:[DIY教室] 情人節pop-up咭,以及情人節大餐簡易食譜

<<閱讀更多>>重要時刻衣著顏色宜忌
 
LOAD MORE