好姊妹嬲我拍拖,點好?

by Jan

相信好多女生都有一個同自己黐到實嘅好姊妹吧?你哋去到邊、做咩都會一齊,係日見夜見嘅「孖公仔」,不過,當你有一日終於拍拖,呢位好姊妹或者會嬲咗你,覺得你俾人「搶」走咗,咁應該點算好?

明白她的想法

你嘅好姊妹可能單身咗好耐,之前又成日同你黐到實,當你拍拖後當然唔可以再成日同佢一齊,佢一時間接受唔到呢份空虛感,亦可以明白。你啱啱開始拍拖,正處於熱戀期,當然好想同男朋友見多啲,自然就分少咗時間俾呢位好姊妹,相對之前嘅相處,突如其來嘅大反差,都會令到好姊妹唔習慣。

勿過分重色輕友

雖然你拍拖係好開心,不過都唔好只沉醉喺愛情世界,過分重色輕友,都唔係一件好事。適當時候,亦要關心下被你「冷落」咗嘅好姊妹,可以耐唔耐打下電話同佢傾下偈,又或者同男友發挖到啲好嘢都同佢開shar下,耐唔耐約佢出街,等佢知道你唔係淨係掛住拍拖而唔理佢。當然,你同佢嘅對話都唔好一味圍繞住男友,如果佢本身對你拍拖已經好唔開心/好嬲,你再係咁講提住男友只會火上加油。

介紹男友

佢作為你嘅好姊妹,你當然要介紹男友俾佢識,搵個適當時機,約出嚟食餐飯,如果男友同好姊妹啱傾,做到朋友的話,以後大大小小嘅聚會都可以一齊出席一齊玩,咁好姊妹自然覺得係多咗一個朋友,而唔係覺得你俾人「搶」走咗!如果佢兩個唔係咁傾得埋,以後亦無謂勉強3人行,咪拍拖還拍拖,女仔gathering還女仔gathering,咁樣你自己仲多咗節目添!

LOAD MORE