過分緊張男友,對方會唔珍惜自己?

by Jan

曾經有朋友問:「係咪我太過緊張佢(男友),令到佢唔多珍惜我?」嗯……雖然不能一概而論,但呢個情況絕對有可能發生。其實兩個人相處要取得平衡,先可以發展一段良好又健康嘅關係架!

過分着緊=佢感覺安全

好多女生都會好緊張、好重視自己男友,時時刻刻幫佢打理好生活上一切,每分每秒都為對方着緊,可能係因為無咩安全感,怕好容易失去對方,所以就對佢勁好,希望可以留住對方個心。其實關心、着緊對方係無錯,但喺行動表達上要適可而止,而且你不得不承認,呢個世界係就係有啲人你對佢越緊張,佢就對你越唔重視。

點解?打個比喻,如果維繫一段關係要出100分力,而其中一個人已經自告奮勇出咗99分,咁另一個人又何必嘥氣力呢?佢知道你點都會順佢意,點都會留喺佢身邊照顧佢,佢又使乜對你咁着緊、咁在意呢?再衰啲嘅話,你越係縱容、越包容佢,佢甚至會變本加厲,挑戰你嘅底線。

切忌迫得太緊

其實拍拖又好,做夫妻又好,最重要係「平衡」相處,要識得收放自如,一時緊張對方,一時俾對方空間,咁樣先可以令雙方過得舒服。

私人空間好重要,迫得太緊、太過黐身都會令對方唞唔到氣(有特殊「僻好」者除外啦……)。有時有啲男人係比較犯賤,你越懶懶閒唔理佢,俾勁多自由佢,佢就會掛住你,搵多啲你。相反你勁煩佢,當佢BB仔咁呵護,佢就越唔想理你……

咁究竟點樣取得「平衡」,就要視乎大家嘅性格同思想,用時間互相磨合,搵出大家最舒服嘅相處方式了。

LOAD MORE