男友冷淡又唔講分手,點好?

by Jan

有一個問題成日都困擾女生,就係男友對自己好冷淡,似係入咗「將要分手」的狀態,但對方一直無開聲,令到女生處於苦苦堅持嘅局面。

男生唔再愛你,但又遲遲唔肯開口講分手,原因可能係:

  1. 唔想做衰人
  2. 唔想煩,如果可以「迫」到女方開口先,可減低被纏繞嘅機會。
  3. 吊住你,當你係後備,起碼身邊有個人肯陪自己。

男生想分手,好多時都會以冷淡嘅方式對待,希望可以令你知難而退。(可參考以下文章:冷淡就是男人的分手預告

咁呢個時候,你可以點做?

1. 先了解對方想法
當你已經開始感覺到對方嘅冷淡,你就要拎出勇氣,搵個好時機同佢冷靜咁坐低傾,了解下佢係想耍脾氣,定佢已經唔再愛你,或者可以同對方協議一個時期,睇下喺呢段期間可唔可以修補到關係。當然事前亦要做定心理準備,佢講嘅嘢會係你唔想聽嘅說話。

2. 適當時機要抽身
如果你已經盡力去挽救,對方仍然無動於衷,你都唔好再糾纏落去,唔好一味俾假希望自己,認為對方一直唔講分手,即代表對方可能仍然愛你,你哋仲有機會相愛,要識得抽身離場。

3. 要走得瀟灑
你知道繼續糾纏、苦等係無用,對方一直唔講分手,都係想迫你開聲先。如果你決定分手,即使幾傷心都好,千祈唔好做埋啲怨婦行為,亦唔好刻意唱衰佢,要走得瀟灑、大方,留返啲尊嚴俾自己。

一段關係係需要雙方互相配合,與其你一直無了期咁等待,自己又一直唔開心,倒不如主動啲去結束呢段關係,長痛不如短痛,咁樣對兩個人都有好處。

LOAD MORE