同男友捱麥記就有幸福?

by Ship Ship

是咁的,網上一篇麥記潮文被拍成短片,個多星期已有超過百萬瀏覽量,更成為身邊男女朋友茶餘飯後嘅熱門話題。究竟肯同男友捱麥記嘅女生,係咪一定係完美女生?一齊睇吓潮文背後嘅三大迷思!

迷思1︰ 唔捱麥記=勢利港女?

潮文講到,男生聚埋一齊,講起理想女生總會提到想對方有劉心悠嘅面孔、陳法拉嘅笑容……殊不知,一個不介意和男生捱麥記的女生,才是世間清泉,娶得過。其實唔食麥記嘅女生真係有好多,並非因為麥記cheap,而是為身體着想。聰明而又愛錫身體嘅的女生都會知道,一個麥記套餐的卡路里含量近乎女生一日所需嘅總和,而且煎炸食品更加是皮膚嘅大敵,當然要敬而遠之!而且,以一客麥記套餐的價錢亦不難找到抵食而又較為健康的食品,所以唔「捱」麥記,大可齊齊歎返碗雲吞麵,又何來勢利港女之名呢?

迷思2︰拍拖食飯平均消費$300?

潮文用咗男主角前女友作例子,道出某些女生拍拖食飯平均消費最少$300,而且大多由男生埋單。究竟拍拖食飯消費幾多才合理?現今在香港食飯貴就眾所周知,不過平有平食、貴有貴歎,應該消費幾多,一切都取決於不同情侶嘅個人收入。大學生時代做 part-time收入未算多,每餐平均消費可能是$100樓下;踏入社會工作後有穩定收入,大可稍為調高食飯預算;遇上節日,花費可能會更多。最重要的是量入為出,女生亦不應「老馮」每餐要男生埋單,有時互相請客,才能令段關係更為長久。 約會堆單問題可參考︰「約會時埋單,邊個俾?

迷思3︰肯捱麥記就等於好快嫁得出?

男生如果找到一個肯和自己捱麥記嘅女生,係咪等於一定會同呢個女生結婚?其實結婚是愛情的其中一個里程碑,當中要考慮嘅問題除咗雙方嘅經濟狀況,更重要嘅係二人嘅性格、價值觀、信仰等更深層次嘅元素。即使一個女生肯陪男朋友餐餐食麥記,但在生活上二人南轅北轍,一個追求未雨綢繆,另一個卻奉行及時行樂;一個深閨內向,另一個卻喜愛日蒲/夜蒲/戶外蒲……若然大家人生取向相差太遠,即使肯同男友捱麥記,但其他方面都格格不入,又點會有幸福的愛情關係呢?

無錯,一個肯同你捱嘅女生係好難得,不過,男生對一個女生好、愛錫佢、珍借佢、鍾意到佢爆炸,通常係咪就淨係因為個女生肯捱咁簡單?

LOAD MORE