擺脫「坐監式」拍拖生活!

by Ella

P最近喺朋友圈中消失咗,原因係,佢拍拖了!好似人間蒸發咗咁,生活只係得返男友,朋友嘅活動一槪唔見人影。原來係因為佢嘅「控制狂」男友對佢每事管,仲限定佢同朋友見面嘅次數,例如有男生嘅聚會唔可以出席,「全女班」嘅活動一個月只可以去3個!

呢個咁極權嘅管制其實一啲都唔罕見,除咗女生之外,其實都有唔少男生俾人管住,時刻要報到,仲要同朋友斷絕來往。

其實人生唔係淨係得愛情,為拍拖而唔見一班識咗多年嘅朋友,放棄自己想做嘅嘢,值得咩?「管家男友/女友」每事管嘅出發點可能係因為愛,但亦有可能只係想滿足佢一己嘅佔有慾。真正嘅愛係應該「愛屋及烏」,融入對方嘅圈子,尊重對方嘅興趣。

拍拖唔係人生嘅全部,被人管住晒絕對唔好受(少數enjoy被管嘅人除外)。如果經過溝通對方依然唔肯放棄「監控」,可能你都要諗清楚,係咪值得繼續同呢個唔在意你感受嘅人發展落去。

LOAD MORE