4間令人置身日本的餐廳!

by 韋寶

眼見好多人去完日本返嚟(包括我!)都非常掛念日本嘅美食,所以今次專程搵咗四間好有日本風味嘅餐廳試食,等大家可以唔使飛身日本,都好似去咗日本咁!
 
1. 吉利日本美食
 
每人平均消費:$300 (以壽司為主的價錢)

環境:★★★☆☆(三星半)
感覺好像日本的小店,牆上以北海道鱈場蟹殼作裝飾,因為呢度有原隻根室產嘅鱈場蟹供應!我當日就見到有人叫鱈場蟹刺身,睇落啖啖肉,的確非常吸引,搞到我都好想搵日豪一次試下($1500/半隻、$2998/隻)!

食物:★★★★☆
九十九島蠔壽司超讚,睇見啲蠔嘅賣相肥美飽滿,你就知道佢有幾新鮮,而且入口唔腥兼帶有蠔香甜味,你要我一次過食六隻都得!另一必食推介係蟹膏,零腥味、極香濃,一吃難忘!

另一款我都幾鍾意嘅係天草大王溫泉蛋壽司,滿口蛋汁再加上壽司飯真係別有一番滋味,而且暫時都唔見其他地方有呢款壽司,所以我每次去都會點呢!
 
而自家製嘅豆腐壽司唔係唔好食,不過豆腐再濃滑啲會更好,試過就夠。帶子亦屬一般,唔夠鮮甜,可以不吃。至於海謄雖然唔係話頂級美味嗰種,但都新鮮,美中不足係唔夠甜啦。
 
講到最令我最失望嘅係牛舌,起初見佢嚟自日本都幾期待,點知食落口質感有啲韌之餘,味道仲有啲好似餐肉定煙肉嗰種薰 / 醃過嘅味道,絕對係中伏之作。
甜品方面,試咗兩款日本雪糕,包括紫薯及柚子味,我覺得前者夠特別,後者夠濃味,值得一試!
 
其他:
店員會等你嚟齊人後介紹是日推介,當中大部分都係從日本新鮮運到嘅海鮮,如夜光貝。好奇問問食材係從何而來,或者壽司汁用咩造,店員都細心解答。美中不足係店子是小店,加單嘅話要等耐啲,不過我支持有誠意嘅小店,唔介意等多陣。
提提大家,呢度嘅位置比較偏僻,我每次去都係搭地鐵到上環地鐵站再轉的士啊。

地址:西環堅利地城爹核士街24號永勝大廈地下
電話:2818 1923
2. 樂宴
 
每人平均消費:約$380
環境:★★★★☆(四星半)
極有日本居酒屋嘅感覺,而且充滿沖繩嘅風味。
 
食物:★★★★☆
大部分都好好食:
自家製花生豆腐滑得嚟仲帶有花生嘅香味;
沖繩風薰豬手伴酸汁香口惹味,點埋個酸汁就無咁膩,一流;
沖繩風炸豬肉芋蓉餅真係落足料,好多芋蓉,而且入面似乎加咗冬菇,味道好夾!
此外,特選和牛火煱嘅湯底清得嚟唔會無味,整體味道都唔錯,不過分量不多,售$358就覺得有啲貴。至於沖繩香腸併盤也不過不失,作為佐酒小食也不錯。
 
其他:
沒有茶水供應,所以當日只好叫杯沖繩四季桔果汁,幸好味道都幾清新,而且酸酸哋幾開胃。
 
地址:銅鑼灣登龍街28號永光中心12樓
電話:3580 8858
3. 白木屋
 
每人平均消費:約$260

環境:★★★★☆
一入門口嘅鳥居已經令我即時諗起京都嘅千鳥居,最鍾意係呢度設有和式房間,可以俾你同朋友自成一角。美中不足係隔音做得唔好,會聽到隔離房講嘢,如果遇上大叫大笑嘅客人,都幾噪架。
 
食物:★★★☆☆(三星半)
因為之前去完京都後實在太掛念豆腐料理,所以今次係為店家嘅豆腐菜式而來,結果都無令我失望,好似白木屋暖暖豆腐同香濃腐皮豆腐鍋都豆香十足,尤其係後者,真係好似喺日本食過嘅腐皮鍋。
至於蟹膏汁冷蟹肉吳豆腐就有啲腥,而且我好唔鍾意佢嘅質感。而特濃芝士極上串亦令人失望,因為零芝士味。
帶子ok,有少許甜味。不過抹茶蕎麥麵就係中伏之作,無抹茶蕎麥味,麵質亦不爽口。
 
甜品方面,試咗鹿兒島黃熊雪糕同特選玉子特濃豆乳布甸,前者個汁係藥水味,而且好多冰,就算雪糕味道ok,我都絕對唔會再叫嚟食。而豆乳布甸則好正,滑得嚟有豆香,滿足!
 
其他:服務方面,唔多人時都唔錯,不過一多人就要等,同埋侍應出去時關門關得唔好,好多時要自己整理返。
 
地址:尖沙咀諾士佛臺1號6樓
電話:2264 8688
4. 田舍家
 
每人平均消費:$1000或以上

環境:★★★★★
田舍家將日本店嗰邊嘅爐端燒setting引入香港,所以以環境嚟計,田舍家係最有日本令人置身喺日本嘅感覺,贏晒呀!而且呢度仲會按照爐端燒嘅傳統,以木漿嚟傳遞食物,所以不得不俾5粒星啦!
食物:★★★☆☆
最驚喜嘅係南瓜同露荀,因為一向都覺得粗身嘅露荀會有渣 / 好嚡,不過食落去唔單止無渣,仲爽口又清甜!至於南瓜,平時我都好鍾意食,不過呢度嘅南瓜係我食過最甜嘅,而且配上牛油嚟燒,真係好好味呀,至今仍很想念呢。
至於日本小芋、免治雞肉、牛舌及帶子,味道中規中舉。
 
地址:九龍柯士甸道西1號環球貿易廣場101樓A
電話:2972 2666
LOAD MORE