好味又健康!簡約別緻的有機餐廳

by Karen C.

早前同男友講我要去採訪一間有機餐廳,佢第一句就話:「有機嘅嘢好難食架喎!」咁諗就錯喇,今次想同大家介紹嘅有機餐廳Locofama Organic Café,除咗致力推廣有機飲食,最重要嘅係,每一道菜都係好味又健康!

Locofama Café and Juice Bar嘅主廚Justin係一位亞裔美國人,係一位好有天分嘅廚師同營養師,一直以來都推崇慢食主義,並希望可以透過呢間餐廳每一樣食物,話俾大家知有機飲食都可以好好味。除咗會以橄欖油代替牛油,更以低溫慢煮嘅方法,去保留食物嘅營養同質感。



Locofama位於西環嘅一條小巷內,裝修簡約別緻,感覺好舒服。

以下就同大家介紹其中幾款菜式:

1. 溫泉蛋配煙三文魚及松露  $25



選用加拿大有機雞蛋,低溫慢煮至流心狀態,伴上上松露、煙三文魚及橄欖油,蛋黃嘅味道好濃郁,加上好香嘅松露,味道實在一流!食落口會感覺到層次,互相唔會搶晒味。特別一提,餐廳提供嘅煙三文魚都係自家醃製及煙燻,好有誠意!

2. 48小時慢煮牛肋肉  $168



呢道菜係餐廳嘅必食推介,將加拿大有機牛肋肉醃一日後,再用55度慢煮48小時,將肉汁完全保留,肉質鮮嫩而且好腍,配上秘製韓式燒烤汁,好味!

3. 煙三文魚溫泉蛋扁意粉 $168



扁意粉係自家熬嘅雞湯同白酒煮成,所以會食得出意粉係有味,而且口感煙煙韌韌。加埋流心蛋、自家煙三文魚及有機火箭菜一齊食,簡單而美味。

4. 野菌烏龍茶冷麵 $88



醬汁係由有機黑芝麻及糯米烘香再攪拌,而烏龍茶冷麵夠晒彈牙,配上野生雜菌,味道清香,鍾意芝麻香味嘅朋友就一定要試試了!

5. 地中海有機藜麥沙律 $138



藜麥係一種南美洲高地特有嘅穀類植物,藜麥營養值價相當高,低卡、抗氧化又可清腸胃。再配上有機蔬及自家製有機羅勒橄欖油,清新又健康。

6. 巴馬芝士雞肉玉米卷 $98



有啲人成日覺得呢類嘅卷會好乾,但今次試嘅雞肉玉米卷,食落口一啲都唔乾,入面捲住白酒雞湯洋蔥磨菇、巴馬芝士、有機雞肉,而且仲加咗檸檬葉,食起上嚟一啲都唔漏,好好味,我覺得仲有少少泰式風味添。

餐廳旁邊更有Locofama Store,出售有機日常用品及食品。

地址:西營盤福壽里13號地舖 (第三街/西邊街附近)

LOAD MORE