男友唔夠上進,嫁唔嫁得過?

by Ship Ship

朋友C有個拍拖多年嘅男友,溫柔體貼不特止仲細心兼顧家,佢都一直當呢個男生係佢嘅結婚對象。但世事無完美,偏偏呢個完美男生的最不完美處就係唔夠上進,身邊朋友都升職加人工時,男朋友仲係原地踏步。朋友C對此好苦惱,到底一個對自己好但唔夠上進嘅男友嫁唔嫁得過呢?不妨先看以下幾個因素再下定論︰

因素一︰明白自己的需求

每個人都有其優點和缺點,兩個人可唔可以係結婚後live happily ever after其實都好睇雙方的需求,到底你覺得另一半明白自己又呵護自己重要啲,還是搵到錢重要啲?假如兩者不能兼得,長遠嚟講,邊樣嘢對你重要啲?如果你可以接受到平淡是福,咁佢嘅唔夠上進,就未必構成嫁佢唔過的因素。

因素二︰提醒自己當初喜歡他的原因

拍拖多年,大家都習慣咗對方嘅存在,雙方都唔會再好似拍拖初期般只將自己最好的一面表現出來。當你因為佢嘅唔夠上進而懷疑自己對佢嘅愛時,不妨問問自己,當初點解會鍾意佢?係佢嘅溫柔體貼定係細心兼顧家吸引咗你?如果佢好上進,但係缺少咗你鍾意佢嘅特質,呢個男生仲係唔係你當日愛嘅佢?

因素三︰時代不同,男女角色更大彈性

現今世代唔再係好似以前咁,男人一定要在外拚搏到深夜,然後妻子係屋企等老公返來飲湯。男女係家庭中嘅角色有更大的彈性,既然朋友C的男友屬顧家一族,咁男友準時收工返屋企準備晚飯,然後等C下班回家就有四餸一湯,白飯任裝亦未嘗不可。最重要的是雙方對大家於家庭中嘅角色有足夠共識,嫁給一個顧家男友可能更幸福。

男女關係從來都唔係1+1的數學題,亦無一個標準答案。若果男朋友沒有你心目中想要的嘅嗰種上進,最重要的都係多溝通,令佢明白你想要咩,協調出一個大家都舒服嘅位,咁先係最好嘅結果。

LOAD MORE