12星座發脾氣點應付?

By COSMO

白羊座

白羊座其實幾小器,好容易發嬲、發脾氣,不過通常都係細路仔脾氣,而且快來快去。當佢發脾氣時,只要好似氹細路仔咁氹吓佢,講幾句無聊笑話,好快就無事。

金牛座

金牛座本身好有耐性,唔容易發脾氣。不過當佢嘅不滿累積到某個程度時,佢就忍無可忍,牛脾氣相當厲害,而且好耐都唔收火。呢個時候,最好俾啲好味嘅嘢佢食,特別係甜嘅,可以平衡佢嘅情緒

雙子座

雙子座十分善變,經常喜怒無常,會無端端發脾氣,好似一陣風咁捉摸唔到。平時愛說話嘅佢,一發脾氣就唔出聲。對住雙子座,其實只要你講吓無聊嘅話題,引開佢嘅注意力,佢很快就會唔記得點解自己會發脾氣了。

巨蟹座

巨蟹座情緒波動好大,發脾氣時,可能會黑口黑面,亦可能會狂喊狂食嘢。當你企圖安慰佢時,佢可能會對你黑面。所以都係同佢保持距離,等佢喺自己嘅蟹殼入面搞情緒吧。

獅子座

獅子座發起脾氣來,真係唔係人咁品,好似獅哮,十分火爆,會勁大聲鬧人或者會亂掟嘢。呢個時候唔好接近佢,俾佢發洩吓,等佢火氣緩和後,可以講啲讚佢嘅說話,佢嘅心情就會好返。

處女座

處女座比較神經質,平時可以好冷靜,但一發脾氣,把口可以似機關槍咁鬧人,而且十分尖酸刻薄。其實你可以耐心地聽佢訴苦水,佢發脾氣總有理由,唔會無緣無故的,然後慢慢同佢講道理吧。

12星座發脾氣點應付?

天秤座

天秤座平時相當優雅,當遇上唔公平嘅對待時,就會發脾氣,bi li ba la咁講唔停,佢其實係要人聽佢嘅原則道理,只要聽,唔好辯駁就好了。另外,你亦可以陪佢去Shopping等佢發洩吓。

天蠍座

天蠍座發脾氣,可以唔聲唔聲,嚇你一驚,佢通常會默不作聲,但眼神相當凶狠,甚至「啤」住你。對於天蠍座,最好都係退避三舍,唔好惹佢。當佢發完脾氣,你就當咩都無發生過就好了。

人馬座

人馬座平時嘻嘻哈哈,令到佢發脾氣嘅,一定係好大件事。而佢發起脾氣上嚟,會好誇張,例如大叫、大力咁揼地,不過只要你對佢講吓笑,甚至做吓鬼臉,小朋友嘅佢好快就會無事。

山羊座

山羊座平時個樣已經夠嚴肅,發脾氣時就更加板起塊面,而且佢只會發自己脾氣,將情緒都抑壓喺心入面。千祈唔好嘻皮笑臉以為可以氹到佢笑,反而應該同佢正正經經咁傾吓,睇吓有咩可以幫佢。

水瓶座

水瓶座古古怪怪,平時或者會大哭大笑,但發脾氣時反而相當冷靜,好似一塊冰咁Cool。呢個時候,佢需要大量空間,你就等佢自己一個人冷靜吓,如果你不斷同佢講嘢,他只會覺得你更討厭。

雙魚座

發脾氣、鬧情緒係雙魚座嘅家常便飯,小則喊唔停,大則吵吵鬧鬧,甚至亂掟嘢,可以好瘋狂。其實佢只想得到其他人嘅注意、關懷同呵護,所以只要你向佢表示你嘅關心,氹吓佢就得。

LOAD MORE