懷疑男友上大陸滾

by Miss Sex

Dear Miss Sex,

我今年22歲,男友大我八年,一齊咗兩年,我哋喺交友app 認識的,除咗食嘢同sex之外,似乎已經冇共同興趣或話題……

當初同佢一齊只係想有個人陪下, 冇諗過會同佢結婚,我嘅心態只係玩玩下,而佢同我一齊咗兩個月果陣已經好認真咁同我講儲錢等我畢業同我結婚……雖然我唔知係咪真,但就姑且信住先……

到依家一齊咗年半,好似已經習慣咗對方嘅存在,唔知係咪因為呢兩年以嚟我肥咗好多(肥咗廿磅),本身已經係一個小肥妹嘅我而家變咗一個大肥妹,男友近半年都冇要求過sex,暗示過兩三次都冇反應,仲諸多藉口推我……

最近我發現佢喺wechat識咗啲大陸女仔同佢哋傾計,睇到啲曖昧對話覺得好嬲,偏偏男友遲啲又同朋友去內地旅行,仲打算自己一個人book一間房……我為呢件事同佢嗌過好多次交,但佢都堅持一定要去……令我忍唔住懷疑佢今次去旅行係咪約咗個女仔方便開房……我曾提出分手, 但佢居然無特別挽留。

Miss Sex,我真係好想知呢個男人點諗?係咪因為我身形走樣所以佢想搵另一個?希望你可以俾啲意見我。

煩惱女友上

親愛的煩惱小姐:

雖然你問的是感情煩惱多於性愛疑難,不過Miss Sex唔想做卸膊公務員,就試着用業餘角度解答。

女人有時就係咁無用,明明覺得自己玩得起有性無愛的遊戲,不過一落場就洗濕咗個頭,不知不覺在意男人的存在,其實個男人唔係咁好的,但你就係唔想無咗呢個人對自己的慾望,唔要佢投向第二個女人的懷抱。

你問我個男人點諗,其實你已經心裏有數,女人的直覺好準的,你懷疑會發生的事就是Miss Sex的答案。當然佢成唔成功係另一回事,但已經無關重要。

重要的是,你提出分手,佢無挽留。一個員工遞辭職信,老闆無挽留,咁下場會係點?

至於男人在床上對你冷淡,係咪關身形走樣事?賤男人即使擁有一個索女友,仍然會去偷食的。愛你的男人,即使你多了肥膏仍覺得你好攬,又或者,他會鼓勵你去keep fit。

你年過四十生過三個小朋友,身材走樣就話無可奈何啫;22歲女話自己走樣,不如話想人認同你不夠自愛。

Miss Sex給你的忠告是,趁自己還輸得起就收拾心情,重新做個揚眉女子。不過你想繼續痛苦,Miss Sex都阻止唔到,就即管坐這架爛車鏟入谷底吧。

希望你明白Miss Sex講嘢咁直接係基於tough love,打者愛也。

祝自愛自重,早日變索。

Xoxo,
Miss Sex

**如果你有任何關於Sex嘅問題,都歡迎email到editorial@cosmogirl.com.hk (subject: Miss Sex),等Miss Sex為你解答。

LOAD MORE