男友睇A片令我好Hurt

by Miss Sex

Dear Miss Sex,

我同我男朋友一齊咗2年,大約一年前左右,喺我哋sex中途,佢突然開咗A片出嚟睇,開頭我察覺到,扮無嘢,但後來越諗越唔開心,因為我feel到佢只係識得focus喺套片,而好似唔想望我咁。最後我推開咗佢,忍唔住喺佢面前喊咗出嚟,因為我覺得佢無尊重過我,無理過我感受,結果不歡而散。

之後佢當然有道歉,氹返我,事後我都有同佢講返我有幾唔開心,表明我唔鍾意佢咁樣做,因為我真係接受唔到佢同我做緊嘅時候望住第二個,佢話已經好後悔,promise以後都唔會再咁做。但係直到而家呢一刻,當我諗返起件事,我個心都會好酸,甚至有時會偷偷地喊。最慘係事後我同我男朋友每次have sex嘅時候,都好自然咁諗起嗰一幕,仲會喺做之前循例咁望吓個電視/電腦係咪播緊A片,就算做都好似「交功課」咁 ,令到我性慾大減,好難先投入到,有時更加唔想同男朋友做!

自從嗰次之後,我覺得自己變得小器咗,好在乎佢睇A片,好在乎佢稱讚女明星或model,有時同佢去街,佢望女仔望多幾眼我都會呷醋……我真係好鍾意佢,但安全感好似已經越黎越少,其實我係咪太過執着?

面皮厚啲講句,喺人哋眼中我個樣唔算差,身材中等。但事後我不停咁問自己係咪我唔夠靚,身材唔夠人哋好,所以佢先喺做嘅途中想望人哋多過我?

希望你可以開解到我!

Best wishes,

Tailes

男友睇A片令我好Hurt

Dear Terrific Tailes,

女人有時好似公司老闆咁,表面扮到好開明(男人睇AV好正常吖,我真係唔介意喎),但當男人言行稍有差池,踩中自己條尾,嗰種小家子氣就會出晒嚟。

首先,站喺女人角度,你男人認真唔識做。喂,睇還睇,唔好鬼鬼崇崇得唔得呀?有無問清楚你女友肯唔肯一邊睇一邊做呀(如果唔肯,你咪靠性幻想囉,使唔使做到咁揚先)?好啦,當睇住AV做可增進情趣啦,都唔好剩係揀自己鍾意嗰啲片咁獨食啦!

男女都好,見到靚嘢望多幾眼好正常,不過女友介意的話,要知道收歛囉(OK,至多俾你射喱眼望0.1秒咁多)。成日讚邊個女明星Model靚,咁俾着你聽女人狂讚馬明BB和永成BB,你都無癮啦係咪?

好嘞,氣就出完,Miss Sex要講女人點樣調整心態。站喺男人角度,男人睇AV係一種「聽話」和「尊重」身邊女人的表現,這表示他很努力抑制內心的動物本能──出去偷食,散播他暫時無乜特別功能的種子。

只要一明白男人的這種委屈,就會諒解多一點,覺得他的行為未至於死罪,尤其是佢道歉完已經無再犯,就應該放開。

其次就係,女人的安全感,和她的幸福一樣,不能只依賴男人施予。

運動又好,打扮一下又好,吃一頓健康美膳又好,女人都應該懂得啟動自我感覺良好機制,令自己變得醒神,自信滿滿。那麼,即使面對男人的「不軌」行為,都不會感到受威脅,相反,會懂得用幽默感和寬宏大量來面對。

所以你死咬住件事唔放,會唔會係你無盡照顧自己安全感的責任呢?Think about that。

希望你會好過點。

Xoxo,
Miss Sex

**如果你有任何關於Sex嘅問題,都歡迎email到editorial@cosmogirl.com.hk (subject: Miss Sex),等Miss Sex為你解答。

LOAD MORE