罕有滋味!溏心鵪鶉蛋+白鱔串燒

by TEXT : 韋寶


溏心鵪鶉蛋 (限量發售) $28/串
 
去黑炙Aburi之前,就知道呢度有溏心鵪鶉蛋串燒,但由於製作要好花功夫,所以每日都係限量發售架!就係咁,令我呢個鵪鶉蛋控更加非常期待呢款串燒!
 
平時期望越高,通常都失望越大。不過,溏心鵪鶉蛋串燒無令我失望,而且食嘅時候仲有幸福嘅感覺!
自家製紫蘇免治雞肉棒 (限量發售) $68/串
 
另一款同樣係限量嘅自家製紫蘇免治雞肉棒,原本我都無乜期望,因為喺唔少地方食過都覺得得個樣,點知,呢款入面加入咗雞軟骨,令雞肉棒生色不少,加上採用日本雞蛋,所以都好好味!
 
白鱔 $45/串
 
另一款必食推介係白鱔串燒,平時出名為食但好多嘢唔食嘅我,其中一樣最憎食嘅嘢就係白鱔,不過見佢個樣幾靚仔,就咬少少試試,點知一食,喂,真係好好食囉!外脆內軟又香口,完全無鱔嗰陣腥味,而且師傅好厲害,燒到入面啲骨都脆埋,所以食落啖啖肉呀!
雞翼 $30/串、竹炭稻庭烏冬(凍) $68
 
我當日仲試咗雞翼同竹炭稻庭烏冬,前者唔會燒到乾爭爭,而後者嘅烏冬都幾爽滑。
 
值得一提嘅係,呢度嘅串燒只會用上輕量嘅調味料調味,當中包括專程由日本訂購嘅竹炭鹽。據說竹炭鹽含有豐富嘅礦物質,而且具有抗氧化同排毒嘅功效,啱晒我呢啲為食又貪靚嘅人啊!
 
Aburi黑炙
地址:灣仔謝斐道266號地下
電話:2877 0077

 

LOAD MORE