落雨「擔遮」的自私行為!

by Jan

落雨令人心情差,除咗因為會好狼狽之外,亦好怕喺街上遇到唔理人感受、兼令你濕上加濕嘅自私精!以下係常見嘅自私行為

1. 擔遮唔避人
條路已經好窄,有啲人擔住把遮橫衝直撞,完全唔理身邊或迎面而來嘅路人。

2. 濕遮擋路
外面落大雨,入到室內,為咗唔整濕自己,就將把遮拎到好開、半擋住條路,隨時整濕埋隔離啲人,甚至篤親人。

3. 擔遮霸有蓋路
有啲人無帶遮,自然會貼住有瓦遮頭嘅路嚟行,不過有啲擔住把遮嘅人,就算見到無遮嘅人都唔會避開,一直行喺有蓋嘅地方,無遮嘅人只好無奈地兜過佢哋嚟行。

4. 對住人收遮
落大雨,入室內/上車時唔理後面嘅人,一轉身就喺人正面收遮,啲水彈到人濕晒。

5. 將濕遮放於檯/椅上
喺交通工具或餐廳等地方,將把濕透嘅遮放喺檯/椅上面,整到濕晒,搞到其他人無得用。

LOAD MORE