Home Feel自家烘焙咖啡店!

by Karen C.

有人會每日飲咖啡嚟「吊命」,但亦到有人鍾意品味咖啡,更認為咖啡係佢哋嘅心靈伴侶。「騷媚咖啡」嘅老闆Jeffie同佢兩位拍檔就係因為鍾意飲咖啡同沖咖啡,所以就一齊開咗呢間咖啡店,為大家提供唔同款式嘅咖啡。

立即睇片:

[movideo|mediaid:489393|size:medium|ratio:16x9]

「騷媚咖啡」位於工廠大廈地下,位置雖然唔太起眼,但就好近地鐵站,一班熟客會經常探訪,同時亦會引來好多新嘅支持者。因為係一間小小嘅咖啡店,老闆們事事親力親為,親手為客人沖咖啡、招呼客人,態度友善親切,而且咖啡杯有好多唔同款式,有公仔圖案、花紋等等,入到去嘅感覺就好似去咗朋友屋企,好free、好隨意。

因為店主係愛咖啡之人,所以每杯咖啡都用心製作,咖啡豆亦係自家烘焙,而且會有唔同類型嘅咖啡豆,希望俾到客人新鮮感,所以,你喺呢度飲嘅每杯咖啡,都會飲得出店主嘅誠意架!

咖啡店亦提供沖調咖啡課程同咖啡拉花教學班,以小班(甚至係一對一)形式,由店主親自教授,有興趣嘅朋友可以向店主查詢。

P.S. 店主Jeffie同小編一樣咁鍾意農場精靈,就連檯上都有佢嘅擺設,太可愛了!

騷媚咖啡 Soulmate Coffee
地址:葵涌葵興葵昌路58-70號永祥工業大廈地下

LOAD MORE