約會時埋單,邊個俾?

by Ella

約會時埋單,邊個俾?

「搞錯呀!想追我但睇戲食飯又問我俾返錢!」

「有時同bf出街想食好啲,但佢又嫌貴……」

「唉……拍拖成日都要使咁多錢,人工多多都唔夠俾啦!」

以上嘅對白相信好多人都唔陌生,無論係互相認識嘅階段、定係拍緊拖,約會中睇戲食飯都要用到錢,究竟邊個負責埋單,一直都係男女之間好難有共識嘅議題。究竟應該點做先好?

Case 1: 大家未係男女朋友關係,但又有potential拍拖……出街邊個俾錢?

始終大家只係普通朋友關係,你亦唔應該大安旨意要人哋俾錢,先主動同佢講話計返錢俾佢(即使佢最後話唔使都好),會顯得你大方得體。

如果佢主動要求埋單請你,你可以禮貌地多謝佢,繼而提出請返佢食甜品,或者下次由你俾返,順便俾個藉口進行下次約會。

Case 2: 已經係情侶關係,究竟應該男方埋單,定係AA制?

其實呢樣嘢好睇大家嘅價值觀,有部分男人覺得由佢哋埋單係天經地義嘅事,你提出要AA,佢反而覺得無面。所以應該以尊重對方意願行先,男友願意餐餐俾錢嘅話,你可以欣然接受,但亦要記得久唔久請返佢,或者主動買飛睇戲等等,令佢知道你唔係「奉旨」使佢嘅錢。

如果大家都各自有工作,男方想AA制,覺得大家應該財政獨立,你亦應該尊重佢嘅諗法(始終現今男女平等,你吓吓繑埋雙手等對方俾錢,似乎都講唔通)。唔想次次都將條數除二計嚟計去,可以提出大家輪流埋單,一人俾一餐。當然,如果佢一分一毫都要計到足,可能你就要諗清楚呢個「數目咁清楚」嘅男人係咪你想要嘅另一半。

Case 3: 大家人工有差距,「有錢人」成日想食貴嘢,但「窮人」就覺得負擔好大。

如果大家嘅收入好遠,賺得多嘅亦應該體諒下對方,商量一下大家都接受到嘅價錢中間位,揀餐廳時互相遷就下。偶爾想去高檔地方消費嘅話,有錢嘅一方可以輕鬆咁提出「今日單生意傾成咗,不如去XXX慶祝,我請吖!」如果係女方賺得多啲,又驚傷到男友嘅自尊心,可以加返句「嗱!記得下次睇戲你請返。」之類,等佢易啲落台。

Case 4: 唔係俾唔起錢,但大家嘅價值觀唔同。例如你鍾意食得好啲,但佢覺得不如慳埋嚟去旅行仲好。

每個人價值觀都唔同,正如女生每個月都花好多錢買護膚品,但唔明男友點解要嘥咁多錢去買相機鏡頭,相反亦都一樣。既然係咁,亦都應該互相尊重。拍拖唔一定淨係行街食飯,都可以做一啲大家都enjoy嘅活動,例如睇戲、行山、打機……總之大家都鍾意又捨得俾錢就okay(想知有咩好做可以參考:好玩拍拖idea!),有啲甚至所費無幾!至於貴價生蠔、parma ham等,都係留返同志同道合嘅朋友去食啦!

LOAD MORE