理性作出同居決定!

By COSMO

好多情侶得閒無事都會行吓IKEA,幻想吓點樣佈置將來嘅溫馨之家,好多人都會幻想同另一半共同生活。由情侶變身同居密友,幸福浪漫畫面少不免,但亦要知道同居絕對係一個big decision,行到呢一步,幾近引領一段關係步向婚姻,又或者……催化因了解而分手嘅結局!
 
要諗清楚自己為咗咩而同居……
 
老實講,事實上有唔少情侶係純粹為了方便做愛而同居。情到濃時,兩個人嘅屋企都唔方便,於是……最「方便」嘅「解決方法」就係同居!以呢個理由而作出同居嘅決定,實在大錯特錯!因為除咗做愛,一段感情、兩個人嘅生活仲包含太多太多其他意義。
 
好多同居過來人都表示,同居後嘅性生活通常會比唔係一齊住時無聊,原因好簡單,物以罕為貴,容易得到就會無前以前咁珍惜;同時亦有可能因為喺生活上,對方一啲之前無見過嘅小毛病會無所遁形,例如牙膏唧到四圍都係、鼻鼾聲勁大等等,喺不知不覺間,將對彼此嘅熱情冷卻落嚟。
 
所以喺作出同居決定前,先問清楚自己為咗咩而同居,理性考慮自己嘅想法夠唔夠成熟。問自己以下問題,可以幫你釐清思緒:
 
‧我係咪為咗唔想同父母同住,或者證明自己係成年人?
‧我係咪因為怕孤單,或者期望佢會照顧我?
‧我係咪想逃避目前某種可怕嘅生活環境?
‧我係咪為咗share租金、水電煤等生活開支?
‧上次同對方鬧交係為咗咩事?同居可唔可以修補問題?定係只會令問題惡化?
‧我以結婚為同居嘅目標?佢嘅想法同自己相同嗎?
‧係你定佢提出同居?你哋嘅關係穩唔穩定?你覺得自己夠了解佢嗎?
 
另一半嘅想法……
 
住埋一齊,將會大幅改變你同佢嘅生活,以及你兩個嘅關係!所以絕對係一件好嚴肅嘅事,亦可以話係一件人生大事。除咗要諗清楚自己嗰方面,亦都要了解佢其實點諗,先可以好好work out出美好嘅將來。所以你同佢要:
 
‧搵個好時機,大家坐落嚟,討論彼此嘅感受、對同居嘅期望。討論嘅內容最好大至結婚生仔、人生目標,小至倒垃圾、洗碗、洗衫、煮飯、餵貓、照顧盆栽嘅分工。
‧兩個人一齊傾清楚金錢方面嘅問題。首先唔好咁快開聯名戶口,最好大家財政獨立,避免不必要嘅衝突。
‧不妨嚟一個「同居密友試用計劃」,例如嘗試同住2個星期。喺呢段期間,唔好只着重表現自己最美好嘅一面,要盡情投入,表現真我,等彼此feel吓對方朝早慌忙出門口個樣、爭電視睇或爭洗手間用嘅情況等等。
 

CG! Tips

如果一個男人同你拍拖無耐,例如只係短短幾個月/幾個星期,就提出同居要求,你千祈唔好隨便say yes!唔少感情同金錢騙子就係藉着熱戀,同女友同居,然後就繑埋雙手做蛀米大蟲,要趕又趕唔走,易請難送,到時你想甩身就麻煩啦!
 

 

LOAD MORE