前度的現任比我好?

By COSMO

女人天生就係容易妒忌!總係鍾意用樣、身材去同人比,當你見到自己個EX同一個樣、身材都比唔上自己嘅女人拍拖,無論當初係你定佢提出分手,個心都會唔舒服(唔高興),如果係男人提出分手的話,相信你更加會嬲到爆!

當你係咁喺到諗佢嘅現任邊度比你好嘅時候,你不如先諗吓以下兩個問題:

1. 你係唔係真係比前度嘅新女朋友正先?

從頭到尾,都係你自己單方面認為你個樣同身材比個女仔好,會唔會有啲自以為是先?OK,身材比較客觀,可以度度呎吋,但樣呢?點解你總係覺得自己靚啲?要知道男人同女人嘅審美眼光係唔同!舉個例,編輯部曾經做過一個簡單嘅調查,問問身邊嘅朋友,到底你鍾意「秀娜」定「法拉」?調查結果顯示,大部分女性朋友都會揀「法拉」,而且認為男人會鍾意「法拉」;然而事實係,大部分男性朋友都比較喜歡「秀娜」。無論你鍾意邊個女神BB都好,個message想講嘅係:每個人嘅審美眼光都唔同,你未必可以用你把尺apply落其他人身上。

2. 就算你真係比個女仔正,亦唔代表個男人就要鍾意你!

男人追求的係「新鮮」,女人追求的係「保鮮」,正如經濟學上嘅Law of Diminishing Marginal Utility, 對得太多,幾靚都無癮!就算你貌若周秀娜,要晚晚對住你,好難保證佢唔會覺得悶,同埋除咗樣同身材,仲有性格夾唔夾等等問題!呢個世界唔係生得靚就大晒,尤其是有頭腦的男人,對另一半嘅要求唔會止於外表咁簡單。其實好難每樣都比較,鍾唔鍾意一個人,有無feel無數得計,無尺可度。如果你到依家都仲咁執着咁介意,會唔會你一直都俾緊壓力人哋同自己? 要記住呢個前度已經係past tense,如果你仲放唔開,損失嘅只會係你自己。

LOAD MORE