男生眼中的「極品」女生!

by 韋寶

男生眼中的「極品」女生!
時不時都會聽到男生話某啲女生:「嘩,真係極品。」,如果你唔想個個男生都怕咗你,就要細讀呢篇文章喇:

自覺完美
自覺係完美女生,以為自己好多人追,成日同人講咁樣令你好苦惱,仲要係咁踩班男生,話人哋無資格鍾意你,而實情只係你太敏感 / 諗多咗。如果想知自己有無會錯意,可以參考:男生對你有意思?有跡可尋。

自我中心
只顧自己嘅感受,彷彿呢個世界只係圍住你轉,乜都要人就晒你,而且從來都唔會覺得自己有錯。例如從不付出努力去融入男友嘅朋友圈子,但每次都要死跟出去,期間仲要佢全程照顧你,稍有不合意就黑面發脾氣,怨男友唔理你;每次大家有分歧,都要男友就晒你,寸步不讓,如果男友逆你意,就話佢唔愛你。

狂數男友
次次出嚟gathering都不斷數自己男友,仲成日話自己要求唔高,都係想男友有上進心 / 對你好 / 顧家(下刪一百字),職業係醫生 / 律師 / 藥劑師等專業人士,唔明點解自己仲未搵到Mr.Right。

手多多
曾經搭地鐵時聽到兩個男生嘅對話,男生A話:「而家啲女仔會無啦啦摸我個胸同揑我手臀,跟住話『嘩,點解你咁大隻嘅』,好恐怖。」跟住男生B話:「係啦,一唔係講講吓嘢就繑住人隻手。」
即係咁,唔係個個男人都覺得咁樣係飛來豔福,反而會覺得你係女色魔。

LOAD MORE