好友的愛情意見一定啱?

By COSMO



朋友除咗係我哋吃喝玩樂嘅伴,對女人嚟講,朋友仲擔當住一個好重要嘅角色──軍師!佢哋對你嘅工作、家庭,尤其係愛情,各方面都到一兩嘴意見,但亦由於呢種軍師角色太過「全天候」,可以話並唔專業。朋友未必存心害你,但有時佢哋俾你嘅愛情意見未必work,反而有可能會累咗你,所以意可以參考,但唔可以盡聽!

例子1
朋友A:「如果你到而家仍然唔肯定你想唔想同現任男友共度一生,咁即係代表佢唔係你嘅Mr. Right……

一段關係走落去,一定會經歷起起落落或者迷惘期,你仲未肯定,亦唔代表佢唔係你嘅真命天子,當你哋共同經歷更多,慢慢你就可以分清佢係唔係你想要嘅終生伴侶。如果只是你一時嘅疑惑,好可能因為你哋嘅關係正處於短暫嘅壓力期,但如果你嘅不滿已經維持咗好耐,咁你就要認真諗清楚。你可以試想像聽日就會同男友分手,你會覺得重獲自由定係後悔呢?

例子2
朋友A:「佢最近對你冷淡,可能已經唔愛你或喺一腳踏兩船,最好就是直接同佢攤牌……

凡事唔好衝動,如果你無證據證明佢有另一個,佢否認都無佢辦法,反而只會將你哋嘅關係搞僵。紙包唔住火,假如你嘅懷疑係真嘅,總有一日天網恢恢。不妨靜觀其變,假如冷淡只係一時,就唔好太過憂慮。如果情況持續,就搵個時間平心靜氣咁同佢傾吓,等彼此了解對方嘅感受同期望。

例子3
朋友A:「你哋鬧咗交,同佢講分手嚇嚇佢,等佢知道你有幾重要……

狼來了嘅故事大家都聽過啦,分手係好慎重而且嚴肅嘅決定,唔可以兒戲,用嚟做威脅嘅工具,萬一佢覺得原來你咁唔認真或無安全感,一口答應,你就恨錯難返啦!

例子4
朋友A:「一段愛情開始時,一定要先發制人,搶先食住對方,否則以後無翻身之日……

兩個人只要相處愉快,又邊有所謂「食唔食住」?香港女仔已經成日被人詬病為霸道、惡死,一段愛情萌芽時,你又管呢樣又管樣,隨時地發脾氣,又或者咩都要由男仔嚟做,反而顯得難服侍兼嚇人。兩個人相唔相處得嚟,最直接有效嘅方法就係做返自己,唔好做戲,咁樣好快就可以摸出大家都舒服嘅相處模式。

例子5
朋友A:「你同佢分咗手,假如搵唔到比佢更好嘅男人點算……

無錯,分手的確可怕,以後要做咩事都要一個人,但係如果你已經非常肯定佢唔係你要嘅人,繼續落去,只會浪費你同你男友嘅時間。有啲人話不如騎牛搵馬啦,坦白講,大部分人都難以做到,假如你有一心二用嘅能力,成日為自己尋找多多機會,你就唔使咁痛苦去考慮要唔要分手啦。正如股票買賣一樣,唔想蝕清光,就要喺適當時間止蝕離場。

例子6
朋友A:「啲耐性,呢個約會對象咁耐先搵你一次,可能純粹因為忙啫……

試諗吓:你寧願要一個有回應、表現到係鍾意你嘅男人,定係一個幾星期先call你一次嘅男人?與其糾纏喺佢到底鍾唔鍾意你上,不如自己拎返個控制權,唔去諗佢諗緊咩,而係諗吓自己覺得呢個人、你期望一個點樣嘅戀人好過。

我們點解習慣要同朋友分享,諮詢意見?因為佢哋係身邊了解、熟悉我哋嘅人。咁會讓人容易忘記咗無論朋友同自己有幾要好,大家始終都係兩個個體。朋友未必可以完全了解你嘅想法同需要,同時你都未必可以完全赤條條咁坦白自己所思所想。所以意見歸意見,最終都要你自己所做嘅決定負責。

LOAD MORE