護膚品放入雪櫃冰鎮,會令功效加倍﹖

By COSMO

曾經聽人講過將西瓜、青瓜同蘆薈等蔬果放入雪櫃冰鎮再敷上面,就可以發揮天然嘅美容功效。其實唔單止生果可以冰鎮,連護膚品都可以!尤其係夏天,冷凍過後嘅護膚品唔單止可以為皮膚降溫,帶嚟舒服涼快嘅感覺,仲可以增加美容功效添!

因為夏天容易令皮膚出汗同沾上污垢,因而令毛孔變得粗大。如果預先將護膚品雪凍,再搽落毛孔粗大嘅位置,一冷一熱嘅接觸,就可以收細毛孔、刺激血液循環、改善出油過度嘅情況,以及加強皮膚吸收護膚品嘅能力。而對於夏天會遇到嘅曬傷同泛紅問題,亦可以用嚟做即時急救,紓緩泛紅嘅皮膚。

你可以將護膚品放喺10-18°c嘅雪櫃入面冰鎮,但記得唔好將護膚品放喺冰格,因為過低嘅溫度會令護膚品變硬,甚至出水。另外,亦建議將護膚品同食物分開冷藏,市面上有一啲專門用嚟冷藏護膚品嘅小型雪櫃,體積比較細,放喺房用好方便。而paper mask、精華素、補濕產品、眼膜、眼霜呢類產品,都特別適合冷藏,因為呢類護膚品多數係液態,含水量較高,冰凍效果就會事半功倍啊啦!

LOAD MORE