夏天必讀!不溶妝秘技大公開

By COSMO


夏日炎炎,日日都超過三十度,早上出門口前化到靚一靚嘅妝,返到學校/公司已經溶咗一半!唔想熱到個妝溶晒慘變「花面貓」,就要細讀以下嘅小貼士啦!

化妝前

1. 唔想熱到出油,就要喺化妝前用冰凍嘅礦泉水或牛奶敷面,咁樣可以幫肌膚降溫之餘,仲可以收緊毛孔。

2. 如果時間充裕,可以敷塊冰凍嘅保濕mask,因為皮膚水分充足,就可以減少出油兼令底妝更貼服。

化妝

1.油性皮膚應選用含礦物成分嘅碎粉,因為其控油效果較佳。

2.容易出油嘅T字位不應搽太厚粉,不妨用化妝掃將碎粉掃勻全面,既可以令肌膚散發自然光澤,亦可減低溶妝嘅機會。

3. 粉狀嘅胭脂比較易甩,而液體狀胭脂則較持久。你可以將液體狀胭脂點喺手指上,以點塗嘅方式搽喺蘋果肌上,然後再慢慢印開,咁樣效果就會好自然。

4. 畫眼線時一定要緊貼睫毛根部嚟畫,以填補睫毛之間嘅空隙,再用棉花棒抹走出咗界嘅眼線,減低眼線暈染嘅機會!

5. 塗眼影前,將眼影掃沾濕後才沾取眼影,可以令眼妝更貼服!

6. 睫毛液當然要用防水、防汗、防暈染的,搽咗一次之後,再搽多一次,可減少變成熊貓嘅機會。

7. 雖然唇膏再度流行,不過如果熱到唇膏都溶嘅話,出晒界就會好失禮,於夏天可考慮選用祼色唇彩,因為佢可以做到水潤感同立體感。

補妝

1.眼妝可先用面油紙輕印眼皮,吸去多餘油脂後,再用手指輕輕掃開眼影「起摺」嘅地方。

2. 先用補濕噴霧為面部和頸部降溫,然後用紙巾輕印,吸去多餘水分,同時將多餘嘅油脂帶走,如有需要,可補上碎粉。

LOAD MORE