朋友問我意見,應該點?

By COSMO

進修、工作、家庭、愛情,無論喺生活中邊一個範疇,遇上疑惑或困難,都會向朋友尋求意見。到底當朋友問你意見時,點樣先可以俾啲啱用嘅建議佢,同時又唔會傷感情?不妨參考以下嘅tips。 

1.  唔好將朋友嘅問題當成係自己嘅
 
有時朋友面對緊嘅問題同你當下 / 以往嘅經歷好似,但呢一刻唔係你分享煩惱嘅時候,朋友正為自身問題而愁,絕對唔想聽你訴苦,因為唔會有兩個情況係完全一樣嘅,對方向你訴苦,而你又講埋一份,對件事根本無幫助,通常對方都唔會因為你有差唔多嘅經歷而產生共鳴。
 
 
2.Be Nice 
 
雖然喺某一刻你好想「點醒」朋友,唔想對方再錯落去,但如非必要唔好魯莽去行呢一步(通常最常見嘅例子就係朋友同自己認為唔恰當嘅人交往)。 
如果件事牽涉到愛情,就要更有技巧咁給予建議。可能朋友呢一刻好嬲,但話唔定聽日又同男友和好如初,回復甜蜜狀態。之前你對佢男友曾作出嘅批評,佢可能會記喺心而唔開心,甚至會疏離你。唔係叫你唔同朋友講真心話,而係既然你嘅意見對對方無幫助,而你無端端就做咗醜人,係咪好唔抵先?
 
 
3.  尊重
 
有時屋企人、朋友唔願意接受你嘅建議,咁就唔好逼佢哋,或者佢哋需要多啲時間去消化你嘅建議到底啱唔啱用。言辭上應避免批評,尤其是當中牽涉唔可以轉變嘅因素。 
應該將注意力放喺尋找解決辦法上,即使最後朋友無接受到你提出嘅意見,都唔好有hard feeling,畢竟對方當初只係想問吓你意見,聽咗之後佢分析過覺得未必係最適合自己都唔出奇。你要明白,佢有權選擇自己想行嘅路,無用到你建議嘅方法並唔代表你哋嘅友誼有問題。
 
 
4.  聆聽+心理支援 
 
靜靜咁聽朋友講佢嘅事,先唔好插嘴。有時你會發覺,將事情嘅前因後果攤出嚟講,解決方法就會慢慢呈現!唔使急住發表意見,因為聆聽已經係一種幫助朋友嘅方式。尤其係如果對方無開口問你意見,就更加唔好主動發言,否則只會埋下摧毀友誼嘅炸彈。 
要記住,有時答案 / 意見並唔重要,因為通常佢哋已經心裏有數,只係想尋求支持同鼓勵。舉個例,佢即將要同男友分手,呢個時候,佢需要嘅係提出分手嘅勇氣,以及面對分開後嘅唔習慣同失落,你唔使提供一百個同男朋友分手嘅方法俾佢嘅。
 
LOAD MORE