男生也是要讚的!

By COSMO

好多人覺得男生唔需要太多讚美,其實就算佢表面上好有自信,實則內心都有可能缺乏安全感。唔好吝嗇你嘅讚美說話,因為你簡單嘅一句,已經足夠light up his day,何樂而不為?

當然,讚都要讚得有技巧,記住以下5個重點:

1. 適當時間

讚美男生不但需要技巧,timing都一樣重要。如果你喺佢班fd面前讚佢對眼好迷人,相信佢會俾人笑足10年,佢唔會開心之餘,仲好尷尬。

所以,要揀你兩個單對單嘅時候,但又唔好太刻意,最好係你兩個傾閒偈嘅時候,不經意咁讚佢。

2. 要夠真誠

有時男生會對自己嘅儀表或者言行缺乏信心,你嘅正面評價可以令佢鬆一口氣,但切忌太誇張。如果佢只得5呎6,而你讚佢高大靚仔過吳彥祖,佢只會覺得難受。你應該就佢嘅個人特質作出讚賞。

講咩好:「你著呢件T-shirt好好睇,好襯你,你係有taste!」、「你可唔可以教我玩飛標?你好似玩得好叻!」

3. 集中焦點

同虛偽嘅讚美一樣,太大路嘅褒獎只會令佢覺得你吹水,對個個都咁講。作出唔切合對方嘅讚美係一般人常犯嘅錯誤,如果你對佢珍藏咗好多黑膠碟感到驚嘆係OK嘅,但如果你讚佢聽歌有品味,就可以更突顯出你對佢嘅好感同欣賞。

講咩好:「我發覺討論嘅時候你唔會隨便附和人哋,有自己一套想法。」、「唱K嗰陣發現你把聲好靚,你唱歌好好聽。」

4. 注重內涵多於外在

男生比女生更注重「食腦」呢樣嘢,無論佢嘅專長係咩範疇,好似係識玩樂器或者識砌電腦,你讚佢哋技術上或者智慧上嘅成就,遠比稱讚佢哋嘅外表更有成效!

講咩好:「聽講你幫Chloe部電腦起死回生,之前好多人都搞唔掂,你真係好犀利啊!」

5. 切忌取笑他

喺一大班人面前,好容易會拎其他人嘅事嚟開玩笑。但如果你啱啱讚完佢,轉頭又同其他人一齊取笑佢,就會顯得你之前嘅讚美唔認真。所以唔好因為人人笑佢你就一齊笑,更唔好叫佢做傻仔之類。相反,喺大班人面前認同佢嘅才華,先可以為佢加油。

講咩好:「唔好聽佢哋亂講,我覺得你記得晒每場波嘅分數真係超勁,我就肯定唔得喇!」

Related Articles:

LOAD MORE