戀情危機突襲!點解救?

By COSMO

 
天王同名模拍咗7年拖,當人人都以為佢哋感情超級穩定兼好事近,二人卻突然分手,男方仲迅速結識公認為更青春更吸引嘅新歡!
 
愛情事千奇百怪,八卦雜誌嘅情節分分鐘都會發生喺你身上。喺呢個時候,又應該點應付?
 
1. 男友「偷食」,但最後回心轉意。
 
Don't
唱衰佢固然唔好,但暗啞底死忍同樣不智。未諗清楚就周圍同人呻,又或者大吵大鬧都係大忌。但如果一味逃避,當第三者唔存在,一樣唔可以解決問題。
 
Do
只要佢係真誠悔過,而你仲愛佢,就唔好輕言放棄。安排一啲俾大家重新相處嘅約會,建立返大家嘅感情。如果佢有心挽救,一定會用行動嚟俾信心你。
 
2. 你哋係時候談婚論嫁,佢遲遲唔肯表態,當你向佢施壓,佢突然提出分手
 
Don't
咁的確令人好難受,但可以點?乞求佢回心轉意?算吧啦!呢種唔嗲唔吊嘅男生,你綁得住佢幾耐?又或者咁講,你和他心目中的將來,可能係兩幅好唔同的畫面,勉強一齊,只係繼續浪費大家嘅。
 
Do
如果可以嘅話,就同佢認真咁傾一次,了解佢心裏面點諗。如果佢玩失蹤,倒不如返屋企煲套韓劇充充電。暫時無咗愛情,人生都係要繼續,而你遲早會搵到一個比佢更珍惜同愛你嘅人。你就當係俾心靈一個悠長假期,俾自己喺呢段時間療傷、復原,然後move on,等待下一段精采愛情出現!
 
3. 現任男友比唔上EX,又或者你分手後一直single,但前度的新歡比你更young更sharp。
 
Don't
確實頂心頂肺,何況大家生活圈子有重疊,耐唔耐gathering都可能會撞到。你心入面可能好想同班好姊妹串個女仔出返啖氣,但咁做只會顯得你好小家,而且令人覺得你仲好在乎前度。
 
Do
你要保持心平氣和,兩個人分了手自有其原因,而且佢嘅一切已經與你無關。世事無絕對,可能隔一排佢想搵你復合,不過你到時已搵到真命天子,唔得閒理佢!
 
4. 男友突然無厘頭嗌分手
 
Don't
點可以俾佢對你呼之則來、揮之則去?No Way!愛可以唔講理由,但分手一定要有point。
 
Do
最緊要保持冷靜,約佢出嚟見最後一次,要佢交代清楚。原因係,總唔可以死得不明不白,同時等自己唔好再犯同樣嘅錯。
 
5. 佢成日約你食飯睇戲,不時同你講埋啲曖昧嘅說話,但又無進一步行動……
 
Don't
唔好飲太多酒,亦唔好太長時間同佢獨處,以免一時意亂情迷做錯事。要知道,你要爭返個主導權,唔應該任人操縱。
 
Do
呢種男生最麻煩,既先嚟挑引你,但又將個主動權交俾你。咁樣就變成係你自己心甘情願送上門,佢要留要走都唔使負責任。你可以將佢當做出嚟hea嘅普通朋友,但就算再寂寞都記住唔好亂嚟!
 
 
Related Articles
 
LOAD MORE