必學!職場生存之道

By COSMO


你有無注意到,公司內有啲同事總係比較出色,亦比較受歡迎,但又唔見得佢哋特別賣力;其他人付出嘅努力唔見得少過佢哋,但無論工作表現、人際關係相比起嚟,都顯得遜色好多。點解?原因未必係前者嘅辦事能力較高,好可能係佢哋嘅工作態度更正面同合時!

「打工仔打份工、返工等放工」嘅心態已經過時!今時今日打份工,唔係要縮細自己去fit in個崗位,將自己當成一部機器,人哋踢一踢就郁一郁、叫你做先做咁低階,咁大家應該抱住咩態度返工呢?

1.邏輯思考

無錯,上司叫你做咩,你當然應該做好本份,但都唔好忘記要理性地分析件事應該要點做。有時上司吩咐你做某件事,未必有時間教你step by step點做,要處理得好,自然要靠你自己嘅邏輯思考了。例如你係一個PR,負責一個尿片品牌,日常工作係聯絡各大傳媒介紹客戶產品,如果你只一味跟住contact list逐個打,唔單止會浪費自己同別人嘅時間,而且仲浪費緊公司嘅資源!因為唔係每個media都會介紹BB嘢,所以你應該聯絡會做相關內容嘅傳媒機構,而唔係跟住個list逐個打。

2.工作第一

好多人轉工、辭職嘅理由係喺公司無朋友、無聊、返工返得唔開心etc.。呢啲人忽略咗工作嘅意義並唔喺識唔識到朋友、好唔好玩、能否成為最受歡迎嘅人。

回歸基本步,僱用同受聘之間嘅關係,係以薪酬交換工作才能。如果受僱嘅一方每月收到應得薪酬嘅同時,只關心同邊個玩得埋、同邊個一齊食午飯,會唔會本末倒置咗?你應該擔心嘅係工作成果、工作有無前途、有無挑戰。如果你覺得同事對你唔友善,或久久未能融入同事圈,就應該先檢討自己待人接物嘅態度,而唔係味擔心。畢竟,我們唔再係學生喇!

3.疏遠是非

有人嘅地方就有是非,更何況喺一星期對足五日嘅office!完全同是非絶緣難度係幾高,但只要唔好做是非製造者,人哋講,聽咗就算,已經好唔錯喇!

如果因為自己討厭某人而叫人唔好同佢玩嘅幼稚行為,喺office就更加唔應該出現!因為過分投入搞是非嘅人,難以得到別人信任,人哋只會喺想將是非宣揚出去時先諗起你,但分派重要工作就無你份喇!

LOAD MORE