編輯推介:4間必食甜品店!

by TEXT : 韋寶、Karen C.

對於我嚟講,甜品係我生命中嘅一部分,因為我無論開心同唔開心,都會好想食甜品!由於太鍾意嘅關係,我對甜品嘅要求都特別高,太甜、無創意、無誠意,我都唔鍾意,所以CG!今次就推介四間必食嘅甜品店俾大家,同大家分享快樂!

1. 韋寶之選:金滿堂甜品
特色:呢間甜品店我食足六年,除咗因為唔會太甜,可以食返食材嘅味道,仲因為佢嘅水準保持得好好,呢六年間佢會不斷推出新嘅甜品,重點係,我每次帶朋友嚟食,佢哋都讚好食,見大家食得開心,令我覺得更開心!
必食推介1:椰皇蛋白燉湯丸 / $36
將椰青水跟蛋白一齊燉,椰香極濃,質感亦非常幼滑,因此一吃傾心,耐唔耐就要去食以解「相思之苦」!
必食推介2:日式紅豆豆腐花 / $24
豆腐花係自家製的,由於唔係採用傳統豆腐花嘅製作方法,所以只有凍食,佢最特別係滑得嚟富豆香,配上紅豆、椰汁同兩粒雪糕糯米糍,正呀!
必食推介3:龍吐珠 / $28
將龍眼同椰汁打溶,入面仲有龍眼肉、珍珠同打得好溶好細滑嘅冰,味道好fresh,係呢個甜品令我知道龍眼同椰汁嘅味道可以咁夾!
 
地址:九龍灣牛頭角道77號淘大商場二期地下G201號舖

2. 韋寶之選:宏

特色:老闆係日本人,因此甜品都用上日本嘅綠茶粉、雞蛋及牛奶等食材製作,而且有唔少都係我最愛嘅抹茶口味!
必食推介1:抹茶芭菲 / $78
共有11層,口感極豐富,最驚喜嘅係抹茶糯米糕,口感煙韌得嚟,綠茶同糯米嘅香味互相輝映!入面嘅抹茶啫喱同抹茶雪糕都好有綠茶味,簡直係大滿足呀!(入面仲有吉士醬、海綿蛋糕及脆蛋白餅等。)
必食推介2:抹茶蛋卷 / $30
我本身唔好卷蛋,不過呢個真係做得太鬆軟,而且中間層cream幼滑得嚟又滲出淡淡嘅抹茶味,再形容多啲,我覺得佢嘅味道幾似green tea latte,只係變咗cream狀。唯一有啲美中不足,就係只有cream有抹茶味,蛋糕就唔覺啦。
必食推介3:抹茶雪芳蛋糕 / $30(一件)
到底佢同抹茶蛋卷有咩分別?就係佢同抹茶蛋卷相反,佢嘅蛋糕有抹茶味,不過質感較乾身,亦不是很鬆軟的質感,而旁邊層cream雖無抹茶味,但同樣幼滑!
p.s. 呢度有啲嚟自宇治嘅抹茶糕、抹茶蛋糕、抹茶布甸及抹茶朱古力等供堂食及買走,好似抹茶糕配初茶(即一年中第一次採摘的茶),堂食價$78。

呢度仲有烏冬供應,我就試過溫泉蛋海藻烏冬,溫泉蛋質感滑溜兼充滿蛋香,個湯係好清嘅木魚湯,而烏冬加入咗日本海藻混合而成,故名為海藻烏冬。
 
地址:佐敦白加士街15號藍馬商業中心地下
3. 韋寶之選:Princess Cafe & Bistro
特色:由於店子以公主為主題,所以蛋糕的造型超美的!我敢說,它的味道絕對比它的造型還要好!因為這裏的甜品味濃而不甜膩,我覺得比五星級酒店的做得更好,而且每每充滿驚喜!唯一美中不足的是,所有產品都不設堂食。
必食推介1:羅勒朱古力 / $48
驚喜,係因為我從來無諗過可以將羅勒用喺蛋糕上。坦白講,我本身不太喜歡羅勒的味道,但原來羅勒同朱古力嘅味道係幾夾架,一入口係濃濃的羅勒味,接着是濃郁的朱古力味,這令我不得不佩服店主的創意!
必食推介2:開心果蛋糕 / $48
平時聲稱係開心果味嘅甜品,九成食落都係杏仁味,但呢個絕對係令人滿足的開心果味!你見佢成個都係綠色,係因為店主落足開心果去整,絕非人造色素嚟架!(呢度嘅甜品全部都無加人造色素架!)
必食推介3:榛子朱古力脆脆蛋糕 / $48(圖左)
喜歡榛子味東東的,一定鍾意呢個蛋糕!一入口就充滿濃郁的榛子味,質感幼滑,入面仲有啲朱古力脆脆同海綿蛋糕,所以唔會好漏。
必食推介4:伯爵茶朱古力蛋糕 / $48
就咁睇以為係朱古力慕思蛋糕,但入面有伯爵茶慕思,最特別之處,係朱古力同伯爵茶誰都搶不了誰的「鋒頭」,兩種味道都並存,而且仲好balance!
p.s.很喜歡這裏的堅果曲奇($158),八種味道包括榛子、開心果、咖啡及芝麻腰果等,咖啡食落好似飲緊咖啡咁,而榛子味人人食過都讚好。這裏的曲奇減低了牛油的分量,加入橄欖油低溫烘焗而成,所以牛油味較淡,但質感依然鬆化。
 
地址:中環威靈頓街115號地舖

4. Karen C.之選:聰嫂私房甜品
特色:藝人梁思浩係老闆之一,甜品款式由傳統到新穎都有,款式選擇多,而且用料充足,絕對係有心思、有誠意嘅甜品店!
必食推介1:龍眼椰果冰 / $28
呢個可以話係「鎮店之寶」,好耐之前第一次幫趁已經係食呢個龍眼椰果冰。特別之處係將冰混合咗椰汁,製成白雪雪嘅椰汁冰,而椰汁冰入面又混合了攪碎咗嘅龍眼肉,而且面層鋪咗少量西米同椰果,口感非常豐富,好有「咬口」,仲要每一啖都係冰冰涼涼,實在係夏天必食之選!
必食推介2:椰汁芒果黑糯米 / $27
椰汁嘅分量恰到好處,而且唔會過甜,味道啱啱好。而芒果肉本身都幾甜,黑糯米中加入咗粟米,比起平時食開嘅黑糯米更有口感。整體嚟講,食完都唔會好漏滯,都幾滿足架!
 
p.s. 如果大家食榴槤嘅話,不妨試下佢嘅榴槤甜品,聽朋友講都好好味,而且感覺係食緊啖啖榴槤肉。另外,仲有加入唔同配料嘅豆腐花、傳統中式糖水等,都係真材實料,製作一啲都唔馬虎架,唔怪得長期keep住大排長龍啦!
 
地址:銅鑼灣耀華街11號地舖
LOAD MORE