成為男人都愛的溫柔女生!

by Jan

大部分男生嘅擇偶條件,都可能會將「溫柔」呢一項列入,無他,溫柔嘅女仔又真係幾得人鍾意。但係,根據非正式統計,好多男生都認為香港女生唔夠溫柔,同時仲大讚台灣女生夠溫柔。其實溫柔係女生天賦嘅特質,可能只係一時之間埋沒咗,想男生更愛你的話,係時候搵返自己溫柔嘅一面出嚟喇!

要發自內心

溫柔,係一種態度,而且係發自內心,唔係話你幫男友打點晒一切,做晒佢要你做嘅嘢就叫溫柔。好多女生嘅態度成日都硬繃繃,好鍾意講道理,擺出一副「生人勿近」嘅勢。尤其係同男友相處時,有時候可能會因為一啲小事而嗌交,呢個時候好多女生都會用一種發脾氣嘅態度去務求得到佢想要嘅結果。

例如:男友想食西餐,你想食日本菜,雙方都好堅持,呢個時候你無謂發晒脾氣話對方唔就你等等嘅說話,可以嘗試用溫柔嘅態度去表達自己嘅意願,男友見你咁樣,會對你加多幾分憐惜,較容易讓步。如果你成日淨係識得埋怨,容易令雙方關係唔好,咁點解唔用一個好啲嘅方法去化解爭拗呢?

溫柔=蠢鈍?

而家社會上有種觀念係「叻=好」,令女生想自己比其他人叻,容易有懶醒、同人爭拗嘅情況出現。對住男友時,你想表現自己係又叻又醒嘅女生,有時就會不自覺擺出強者姿態,女性特質即時大減。即使道理喺你嗰邊都好,你都無需要用呢啲態度同語氣去拗贏對方,令對方屈服,咁樣只會令男友無面,覺得自己無用。

雖然係咁,但唔代表叻嘅女生就唔可以溫柔,溫柔嘅女生亦唔代表係較蠢鈍,只不過係,喺同男友相處時,識得收放自如,對住男友會表現應有嘅特質,識得尊重對方,令對方覺得同你一齊係舒服。

想容易啲展現自己溫柔嘅一面,亦可以從日常生活入手:

打扮:可以將自己打扮得女仔啲,雖然未必人人走girlish路線,亦唔係要你完全改變自己嘅衣著風格,但可嘗試喺打扮上加入少少女仔啲嘅元素,不妨從飾物或隨身物開始入手。

說話語氣:講嘢嘅時候唔語氣好咁倔,亦唔好咁大聲(當然亦唔好成日一輪嘴),應盡量保持一把柔和嘅聲線。

肢體動作:講嘢時唔好成日手舞足蹈,動作太大比人感覺粗魯。

增加興趣:閒時可以試下煮食、整甜品或做一啲小手作,享受過程中嘅樂趣,突顯自己細心嘅一面。

關心他人:多啲關心其他人,除咗男友,仲可以多關心家人同朋友,即使係好基本嘅關心,例如:「凍唔凍?」、「工作累嗎?」等等都可以,喺你關心別人嘅時候,你溫柔嘅魅力就會自自然然散發出來。

LOAD MORE