擺脫內疚感的6個方法!

By COSMO

人人都會犯錯,犯錯後,我哋可能會覺得內疚,但係過分嘅內疚感會令人好痛苦,我哋一定要搵到方法令自己釋懷,因為認錯雖然重要,但單單用內疚嚟折磨自己,都係於事無補。覺得內疚時,我哋可以咁做:

1. 不斷重複諗嗰件已經發生咗嘅事係無用嘅,不妨試下同朋友講,你會發現事情未必好似你想像中咁差,因為第三者可以令你用另一個角度去睇同一件事。

2. 設法補救。即使實際上未必可以挽救到啲咩,但至少你自己同有關人等都會欣賞你嘅態度。

3. 諗下嗰件事會唔會同你過去嘅一啲陰影有關,如果有,你要處理嘅就唔只係當下發生嘅事,不妨趁呢個機會,將一直困擾你嘅障礙清除。

4. 提醒自己:人唔係完美。接受自己唔完美嘅部分,唔好對自己要求過高。嘗試寫一本日記,裏面記低嘅,全部都係你嘅優點同做過嘅好事,用嚟激勵自己。

5. 做啲運動、煲套劇,等思想有喘息嘅空間,避免不斷鑽牛角尖。

6. 同啲比你中肯、可以給你有用意見嘅人對話,搵出以後做得更好、唔再重複犯錯嘅方法,重新出發!

LOAD MORE