女生做主動的5個大忌!

By COSMO

女追男並無問題,但主動得無技巧無趣味,就好大問題!好多女生就係因為太執着兼用錯方法,導致行為表現怪異,完全喪失女性應有的可愛面,搞到自己似個瘋婦,追唔成不特止,仲分分鐘嚇走potential男友。
 
‧太猴擒:一見對方online,就以0.0000001秒同佢Say Hi,他每覆一句,你就以0.0000001秒極速回話,佢唔應你,你就狂打字過去問東問西,每日如是,係人都會怕咗你。男人最怕就是壓迫感,一感到壓力,就會逃之夭夭,最緊要係唔好煩。
 
‧誇張行為:在一些一班人嘅聚會,有些女人以為咩都大笑一餐、懶hyper,或者用誇張嘅肢體動作去吸引異性注意,以為咁樣可以突出自己,令對方覺得你很特別。無錯,你好特別──特別失儀。咁只會令男人覺得你癲癲地,邊個想要一個玩起嚟嘈冤巴閉嘅女朋友?
 
‧扮嗲:無錯,有時女人撒下嬌會顯得很可愛,但都要睇對象同有自知之名。如果你已經幾十歲,就算係可愛教主咁嘅樣,喺公眾場合對任何事都狂dum地詐嬌,句句說話都加個「㖿!~」開頭,係會令人反感。
 
‧過分關心:有些女人集中火力以噓寒問暖攻勢出擊,例如日日買早餐俾佢,幫佢收拾辦公枱,以他媽媽/家傭/愛人嘅姿態出現,做得過火,只會有反效果。他眼中唔會見到你的好,只會見到其他人奇怪的目光,因而想極速擺脫你。
 
‧投懷送抱:有啲女人過分desperate,去唱K、飲嘢時借酒行兇,死迫他和你合唱,乘機投壞送抱,以為咁就叫做主動,其實只係將自己降格。有啲男人無推開你,可能只係覺得你自動送上門,何樂而不為。就算你對他好真心,喺佢眼中,你可能只係一個隨便嘅女人。
LOAD MORE