結婚唔係咁簡單!

By COSMO

你跟他相愛了,認定對方係終身伴侶,願意作出承諾,希望浪漫嘅結婚進行曲伴着你倆步入教堂,但……Sorry,好掃興地,結婚永遠唔會同夢想一模一樣,往往會勾起一連串同金錢、樓、酒席有關嘅問題,掙扎同爭拗萌生,浪漫感覺慢慢減少。究竟相愛係咪就大晒?有咩係需要考慮清楚?

確定終極結婚目標

每個人想結婚,都有唔同嘅原因,可能係因為想將愛情昇華到另一層次,可能係想組織家庭,或者想要一個浪漫嘅婚禮、想買樓、想着婚紗、想喺幾多歲前生仔……

最重要係諗清楚個人嘅結婚終極目標係咩,而且一定要諗得好清晰,而唔係「因為反正將來都要買樓,不如順便而家一齊買」這類扭曲了、模糊化咗嘅理由。

要有咗清晰嘅目標,我哋先可以好好規劃往後嘅結婚大計,省卻好多不必要嘅煩惱。

心態上嘅考量

一講到結婚,好多人都會立刻諗到居所、置業問題,於是煩惱就隨之而來,尤其喺香港,買樓越來越難,根據好多人覺得要有樓先結婚嘅諗法,結婚亦越來越難了。其實無論買唔買樓、擺唔擺酒、去邊影婚紗相、度蜜月,只要依據終極結婚目標辦事,調整一下心態,有助你理清思緒,減去不必要嘅壓力同煩惱。

經濟衡量

聽過唔少女生抱怨:「同佢拍咗幾年拖,都有結婚打算,但佢又無經濟基礎,儲唔夠錢俾首期,咁點結婚?!」

問自己幾個問題:

-問多自己一次,點解想結婚?因為愛?因為年紀?點解想嫁俾眼前呢個人?

-你嘅「理想結婚對象」條件係咩,合理嗎?而眼前呢位實實在在嘅「結婚對象」有咩特質符合你嘅要求?

-如果佢有啲條件符合,有啲唔符合,你將自己人生嘅追求排過先後輕重次序,再配上你嘅終極目標,佢值得你考慮嗎?

-如果你覺得佢好唔符合你嘅理想,點解你仲想同佢結婚?你嘅答案,符合你心底嘅終極目標嗎?

-無錯,如果話對方有錢又醒目又錫你又細心又有幽默感又專一……邊個女生唔想嫁?如果你想要100分嘅真命天子,為甚麼要逼迫眼前人完成不可能嘅任務?如果你覺得眼前人都有可取嘅地方,佢又係咪都可以成為你嘅白馬王子?

婚禮ABC

一提到結婚要搞嘅種種大小事情之繁複,有啲過來人會話:「結婚係人生大事,係咁㗎喇,呢個係人生必經階段。」有人因為怕煩而唔願結婚,亦有人喺呢個「必然」嘅繁複過程中退下戰線,令婚姻泡湯。

心態考量:

- 結婚當然係人生大事,但重要嘅事,係咪一定煩惱同複雜?

- 嗰啲大部分人都做嘅必然動作,對你嚟講有邊啲係必需?有邊啲係非必要?

- 如果你覺得無做某啲嘢係一個缺失,點解?

- 我哋的確唔能夠只顧自己感受,亦要顧及身邊人嘅期望,但要先考慮自的能力可以去到邊,界線應該劃係邊?

一生人一次的迷思

唔少人開始時都話簡簡單單就好,但結果婚禮越搞越複雜;講到底,好多時都係為咗「人生人一次」呢5隻字。每個女人都想要一個完美嘅婚禮,但你的完美標準是甚麼?獨特、難忘嘅定義因人而異。別忘了結婚唔係婚姻嘅全部,而係婚姻嘅開始。婚禮完咗之後,兩個人仲有漫長嘅人生路要行呢。

 

LOAD MORE