被好友出賣,應該絶交?

by Karen C.

同好朋友識咗好多年,一直以來都好friend,直到有一日發現佢出賣咗自己,你會晴天霹靂,傷心同憤怒嘅情緒出晒嚟,然後最煩惱嘅係,你應唔應該原諒佢同埋再次相信佢呢?

最常見嘅被出賣情況係:

-對方口疏,是非當人情,將你嘅秘密話咗俾其他人知。

-呃你錢,甚至呃埋你屋企人錢。

-向其他人「篤你背脊」,講你是非,喺你背後搞小動作。

-搶你男朋友

根據小編的非正式統計,最難以接受嘅係被搶男友,因為一時之間失去咗兩位至愛嘅人,十成十嘅人都會從此同對方絕交!至於其他方面嘅,就視乎被出賣嘅嚴重程度,反而錢銀方面, 似乎比較容易原諒(如果數目細的話),最多以後唔再借錢俾佢,但未至於無朋友做。

事必要搞清楚

當你冷靜過後,你可以先衡量下對方出賣你嘅係小事定係大事,然後三口六面同對方傾清楚,再決定點樣做。

衡量可原諒程度

如果係口疏之類,對方可能都係無心之失,你亦可以試下原諒佢一次,再慢慢觀察佢嘅為人,如果佢仲當你係朋友,佢會知衰,唔敢再多口。

如果對方做嘅事令你不能原諒,你都唔需要勉強自己去同佢做返朋友,佢可以咁樣出賣你,就已經一早唔當你係朋友,呢件事可以令你睇清一個人,知道事實嘅真相。

不要勉強自己

雖然你哋之間可能有共同朋友,會喺度講「識咗十幾廿年,咁樣無朋友做好可惜」之類嘅說話,但係佢哋唔係被出賣嘅人,當然會講得比較輕鬆,所以你都唔需要勉強自己去扮大方,做你認為啱嘅決定就可以了。

雖然對方可能做咗啲好過分嘅事,但你都唔需要去報復或者講佢壞話去傷害返佢,咁樣只會令自己一直在意,過分耿耿於懷的話,只會令自己更加唔開心啊!

LOAD MORE