可以增進感情的「愛情年檢」!

by Karen C.

年尾除咗要訂立新年大計之外,仲可以同男友一齊做一個「愛情年檢」,即係檢討下過去一年來你哋嘅感情上有無出現啲咩問題,然後作出改善,咁樣可以令大家嘅感情更進一步架!

你哋可以從以下三方面開始進行檢討:

。相處及溝通方式

過去一年你同男友嘅相處同溝通方式會否成為你哋增進感情嘅障礙?例如你哋習慣講嘢講一半,以為彼此好有默契,講少少已經覺得對方明你講咩,最後原來對方唔明白、唔知道,就會導致好多不必要的誤會!

。恩愛度

你同男友究竟有幾恩愛?感情有幾好?即使你哋唔係糖黐豆(亦無必要做糖黐豆……),都要保持一定嘅恩愛程度!係咪無時無刻都會好關心對方?有無經常照顧對方嘅感受?有無耐唔耐製造小驚喜氹對方?

。吵架指數

數數過去一年,你同男友嗌交嘅次數有幾多?會唔會係「三日一小吵,五日一大吵」?諗吓嗌交嘅原因係乜嘢,從而搵出方法去減少嗌交嘅次數,可能係大家要互相遷就多啲,或者改下啲壞脾氣。如果發現自己成日發脾氣,不妨喺未來嘅一年,學下控制自己嘅脾氣,唔好因小事而同對方嗌交喇!

P.S.做呢個「愛情年檢」嘅目的係想令大家感情關係發展得更好,所以要心平氣和咁傾,千祈唔傾傾下變成互數對方缺點,最後嗌交收場啊!

LOAD MORE