編輯精選!5大拉麵店試食報告

by Karen C. / 韋寶 / Cynthia / Anty Fung

拉麵店開得越來越多,先發現原來香港人咁鍾意食拉麵,有啲拉麵店更加大排長龍,咁究竟邊間好食? CG!就特別邀請咗讀者Anty(佢係拉麵達人!)推介三間拉麵店,然後三位網編齊齊出動試食!另外,我哋額外挑選多兩間去試,所以今次總共會同大家分享五間拉麵店嘅試食報告!

p.s. 小編發現每個人食拉麵嘅口味都會有唔同,所以大家只作參考啦!:)

Anty Fung

吃喝玩樂無一不精, 深明飲食之道在乎嘗試。每一次對一種食物認真,必定花盡最大的努力試盡城中熱店!數月前迷上了拉麵,試了不下二十家,試盡餐單上每款拉麵及限量版拉麵。堅持每次吃拉麵必會把湯喝完,吃麵條吃出淅瀝呼嚕的聲響。畢竟,評飲論食的背後不能抹殺那副饞嘴格!以筆名安迪風每周於主場新聞撰文,論盡風花雪月。

長浜No.1拉麵

(左) 玉子拉麵 ;(右)長浜No.1拉麵

Anty推介:玉子拉麵
我是衝著這家店醬油香和生熟度平衡感佳的玉子和重乳香的博多風豬骨湯而來的。平日午飯時間受不住熊本的重型湯底,博多風香而不膩,整碗喝光也不會「麵」氣攻心而睏倦。叉燒稍遜於魂拉麵拉麵來肥瘦相間得宜的版本。然而,如果要數能熬出齒頰留香的湯底的拉麵店,長浜No.1一定高踞我的榜首。軟糯的豬乳香,硬身拉麵加上那隻半生熟玉子,Ichiban!

編輯試食報告:

試食款式:長浜No.1拉麵 / $98、玉子拉麵 / $82

湯底:★★★★☆(四星半)

呢個係韋寶食過最好味嘅豬骨湯,難怪在今年的「米芝蓮車胎人美食」之列(我最愛嘅雞湯拉麵拉麵來耶)。

到底長浜個湯有幾好?佢唔單止香濃幼滑,仲好有層次,實在一吃傾心!有得揀落/唔落香油,落咗亦不比唔落油膩,不過我就建議唔落,因為既然都夠好味,食少啲油始終健康啲!唯一美中不足,是湯底雖不算油膩,但飲得多會有點「漏滯」,所以我當日都食唔晒碗長浜No.1拉麵

麵質:★★★☆☆
由於我偏好彈牙的拉麵,而呢隻係幼身偏腍,所以我覺得一般。此店可以揀軟/普通/硬/極硬的麵質,當日我哋揀咗普通。

溏心蛋:★★★★☆(四星半)
有醃過,而且仲有蛋香,食完覺得好滿足!

服務:★★★★☆(四星半)
我好奇問問長浜No.1拉麵拉麵數量是否比玉子拉麵多,店員答完「一樣架」後,仲解釋Karen C.嗰碗有香油會香啲,重點係,佢竟然記得我同Karen C.係揀咗咩!勁呀!

環境:★★★☆☆
座位雖少(約二十個),本身環境亦ok,不過當日我哋坐喺最埋嗰張檯,開頭坐低同離開時都輕輕聞到少少異味,所以扣咗分。

其他:長浜No.1拉麵同玉子拉麵同為豬骨湯底,不同之處在於前者較多叉燒、紫菜,仲多咗辛子高菜(有點辣的),個人認為食量一般的話,揀玉子拉麵會平啲。

地址:中環九如坊14號地下

拉麵


金(濃厚豚骨湯)


水(骨膠原雞白湯)

Anty推介:魂之一杯
拉麵遠不止吃碗中物的,周遭氣氛添點昭和年代的古早風,深夜食堂般的木裝修,如虎添翼。拉麵來的魂之一杯只限周末供應,每日三十碗。濃稠得不見底的褐啡色的熊本風湯底,上加炸過的金蒜和兩片真正「入口即溶」的叉燒 ﹣ 物如其名,此乃一杯豬骨濃湯的靈魂!骨髓的味道濃烈,湯底像醬汁般,飽肚感十足。首次喝湯的時候感到自己正在茹肉!愛豬者及肉食獸不可不試之物!

編輯試食報告:

試食款式:金(濃厚豚骨湯)$78、水(骨膠原雞白湯)$88
試食當日係閒日,所以試唔到Anty推介嘅魂之一杯,經店員推介後,就揀咗豚骨湯同雞白湯嚟試!

湯底:豚骨湯★★★☆☆、雞白湯★★★★☆
兩個湯底相比之下,雞白湯好味啲同特別啲,附有一舊骨膠原,未加入個湯之前,已經有濃而不膩嘅雞湯味,好好飲!反而加咗骨膠原之後好似無咁好味,建議大家落骨膠原飲多幾啖先。而豚骨湯就無想像中咁濃,可能因為雞湯感覺太驚豔,相比之下就無咁好味了。

麵質:★★★★☆ (3星半)
麵質可自行選擇軟硬度,當日我哋揀咗普通,食落口都算彈牙,不錯!

溏心蛋:★★★☆☆
每隻另加$15。蛋有醃過,而且有蛋香,當日隻蛋尚算溏心,但邊位熟咗少少。

服務:服務:★★★★☆(四星半)
店員好熱心介紹每款拉麵,而且當日天氣凍,我哋著咗大褸,當我哋一除件褸嘅時候,店員已經準備好衣架幫我哋掛起,非常貼心!服務殷勤得嚟唔會令人覺得煩,讚!

環境:★★★★☆
雖然面積較細,得兩排bar檯位,但裝修好有日本風味,唔錯!

其他:Lunch time去食,每人免費送咗一支可樂!

地址:大坑浣紗街20-22號地下B舖

麵鮮醬油房 周月


帆立貝油麵


拌勻後的帆立貝油麵


周月拉麵

Anty推介:帆立貝油麵
假如閣下不是常以的士代步的話,到周月吃拉麵是需要決心的。在中環站還是上環站到位於歌賦街的周月,大概十分鐘路程,其中五分鐘需攀斜路。食過返尋味,我攀了不下十次。這家店的名物乃Tsukemen 沾麵,然而我更愛他的Abura Ramen 帆立貝油麵。精髓來自那隻生蛋,把麻香惹味的帆立貝油的味道完全混和在周月彈牙的粗麵、切成條狀的半肥瘦叉燒及配料中。前陣子還推出了限賣兩天的海老油麵,可謂為香港拉麵界揭開新的戰幔!

編輯試食報告:

試食款式:帆立貝油麵$85、周月拉麵 $85

湯底:★★★☆☆ 
由於帆立貝油麵係撈麵,所以無湯底可評,撈嘅拉麵好少有,麵底本身已放帆立貝油,食客再自行加入生雞蛋攪勻,味道特別,個人認為加入醋和秘制醬汁更好味,不過成碗麵好多油,食完好「漏」。周月拉麵嘅湯底係魚同雞骨湯,並加入咗醬油,我哋揀咗「傳統濃口味」,感覺鹹咗少少,而且略嫌油咗啲,建議大家可以選擇「淡口」湯底試吓。

麵質:帆立貝油麵 ★★★☆☆  (3星半)、周月拉麵 ★★★☆☆  (3星半)
帆立貝油麵所用嘅係粗麵,食落口相當煙韌彈牙,非常有口感。周月拉麵係幼麵,硬度偏硬(無得自選軟更度),口感一般。

溏心蛋:★★★☆☆  (3星半)
有醃過,蛋黃亦夠流心,不過得半隻,唔夠喉。

服務:★★★★☆
店員好熱心,有詳細介紹每款拉麵,又會幫我哋手將隨身物品整理,好好安置喺椅子底下。

環境:★★★☆☆  (3星半)
座位都係並排而坐,但坐得舒服,唔狹窄。

其他:燒黑豚肉香口惹味,不錯!每檯都會有一壺冰凍大麥茶飲任你添飲,好飲又有消滯作用(小編忍唔住飲咗好多杯)!注意,要收加一服務費。

地址:中環歌賦街5號地下

鳥華


(左)雞白湯拉麵 ;(右)醬油拉麵 

試食款式:雞白湯拉麵$69、醬油拉麵$69,另加半熟蛋$10隻) 及切片雞肉叉燒 ($16/3塊)

湯底:★★★☆☆  (3星半)
招牌雞白湯很清,一點也不油膩,但略嫌味道太淡,不太食得出雞味。反而醬油湯底更惹味,濃淡度剛好,不會太鹹,又不會太油膩。2個湯底都適合喜歡清淡口味的人。

麵質:★★★★☆
拉麵夠彈牙,粗幼適中,掛湯能力亦佳。

溏心蛋:★★☆☆☆ (2星半)
蛋沒有醃過,也沒有蛋香味。蛋黃幾乎全熟,沒有溏心效果,有點失望。

服務:★★★☆☆ ( 3星半)
中規中矩,侍應服務態度不錯。

環境:★★★★☆ (4星半)
人流不算太多,檯與檯之間也有足夠空間,坐得舒服。

其他:追加的雞肉叉燒味道只屬一般,不太能食得出雞味。

地址:銅鑼灣伊榮街1號地下

常勝軒


特製日式沾麵


特製拉麵

佐敦新開嘅Ramen Champion 總共有六間拉麵店,形式好似一個food court咁,今次就揀咗常勝軒嚟試食!

試食款式:特製日式沾麵 $98、特製拉麵 $98

湯底:★★★☆☆ 
沾麵湯底比特製拉麵的湯底較濃郁,用來點麵食都OK,佢會比碗清湯你溝淡嚟飲,等你可以溝落沾麵湯底嚟飲,但加咗清湯就咁飲仍然覺得鹹咗啲。

麵質:★★★☆☆ 
兩款都係用粗麵,口感唔錯,有咬口。份量頗多,女仔會食唔晒。(特製係會比較大碗)

溏心蛋:★★★☆☆ (3星半)
有醃過,都算幾流心,蛋汁比較稀,略嫌蛋黃味唔夠濃郁。

服務:★★★★☆
本來以food court自助形式經營,本來無服務可言,每個人落單後會獲派發一個「呼叫器」,拉麵整好之後要自行前往櫃面領取,但當我去拎拉麵時發現兩碗一樣,先知店員落錯單,立即要求改返啱嘅order,之後店員竟然親自將啱嗰碗拉麵送去我哋個位,而且仲係咁講唔好意思,連另一個講日文嘅店員都出嚟道歉,令我印象幾深刻!

環境:★★☆☆☆ (2星半)
Food court般的環境尚算寬敞,但試食當日常勝軒某個位置的天花板漏水,不停滴落張檯,搞到要換位,扣分!

其他:每檯放咗壺冰凍綠茶任你飲,食完啲咁濃味嘅嘢,可以清清個味蕾,不錯!

地址:佐敦彌敦道222號恒豐中心地庫Ramen Champion 6號舖

LOAD MORE