訂立新年大計的3大原則!

by Karen C.

話咁快就到年尾,係時候要開始訂立新一年嘅大計喇!如果你以前唔會咁做,不如由今年開始試下,因為咁樣可以令你嘅生活過得更充實同有意義。不過,訂立新年大計都唔可以亂咁嚟,否則會難以實踐!

1.具體

如果目標唔夠具體/太空泛,咁就等同無目標,例如你嘅願望係多做運動、買少啲衫,就唔夠具體。應改為每日跑步30分鐘,或者每個月最多只可以買一件衫。

2.可達成

訂下過多嘅目標,會好難做到之餘,你亦好容易會放棄。如果你有好多嘢想學,例如日文、瑜伽、結他、跳舞等等,你唔好一次過就報晒咁多個course,應該分階段學習,學完一樣還一樣,否則最後你只會覺得好吃力而放棄,令每樣嘢都學唔成。

3.實際

訂立嘅目標要實際,應根據自己嘅實際情況嚟決定,如果訂下嘅目標同自身條件相差太遠,就好難做到,例如你嘅人工每個月只係一萬蚊左右,你就唔好要求自己一年內要儲到十萬蚊,因為咁樣你會無晒自己嘅生活之餘,又會過得好辛苦。

LOAD MORE