同居前要考慮的5大方面!

By COSMO

由情侶變身同居密友,幸福浪漫畫面固然有,但唔甜蜜唔溫馨嘅情況都唔少,所以喺作出同居決定前,一定要理性考慮。同居係一個BIG decision,因為行得呢一步,可能係將你哋嘅關係步向如婚姻的未來,又或者……喺近距離「埋身肉搏」下,催化了因了解/不能諒解而分手的結局!

不妨就生活上、心理上各方面,細節的睇吓同居將會面對一啲咩狀況,等你可以更立體地作出考量,同時方便你同伴侶事先約法三章。

1.空間與私隱……

住埋一齊,又係咪等如由搬入去嗰一刻開始,你哋就結合成連體嬰,從此吃喝玩樂睡都要一齊?事先必須講清楚同居後,兩個人會花幾多時間一齊,又有幾多時間想獨處或約朋友出去玩。

住喺同一間屋,總有啲地方係屬於各自嘅地盤,例如各自的書枱、各自的電腦、衣櫃、抽屜等,咁某啲地方要上鎖嗎?

如果上鎖,對方會唔會覺得你有事隱瞞佢?你又有權開佢嘅抽屜嗎?佢會想你幫佢整理衣物嗎?佢介意你用他的電腦嗎?呢啲都要事先溝通好,有時候即使你願意幫佢執拾,對方亦未必覺得舒服。

大家都識得講一切在乎互相尊重,但住埋一齊,漸漸會少了一份客氣,到底嗰條尊重嘅界線應該劃喺邊個位置,你哋一定要討論清楚啊!

2.居家閒情……

同居生活就好似婚姻生活咁,由拍拖時的快樂浪漫,變成要每日面對無咁浪漫嘅柴米油盬,邊啲家務由邊個負責?統統都要有心理準備。因為到時,你已經唔可以用唔高興就唔聽佢電話,或者唔見佢來抗議。

女人好容易有個誤解,以為同你同居嘅男人會好似你爸爸一樣萬能,會自動自覺更換燒咗嘅燈膽,會修理屋企大小電器、廚廁用具,當你發現佢唔太積極處理呢啲家事,或好似個BB時,你會失望,從而對佢扣分嗎?

共同籌備家居布置固然浪漫,但當中仲有好多足以導致感情破裂的地雷,包括選址、由傢俬到擺設到牆身顏色的選擇等等,例如佢有可能接受唔到你將多年來收集回來的心愛Hello Kitty放在客廳當眼處,而你又唔想全屋都用黑沉沉的窗簾、床單。

3.金錢世界……

「講錢就失感情」,無奈地兩個人住埋一齊,就要面對呢個問題。以前約會,佢經常包攬所有使費好似係理所當然,但到了共同生活,作為一個打工仔的他,無可能繼續維持呢種瀟灑,你都要開始出一份了。

假如要買新傢俱、電器,要俾嘅錢點攤分?假如所有新添置的東西,一開始就一人出一半會比較方便,否則最好保留所有單據,萬一將來要面對分手,數目便一目了然,可省卻唔少爭拗。

作為女人,一定要識得保障自己,無論感情、金錢都唔可以被欺騙。同任何人同居前,你要肯定佢經濟狀況良好、無欠債,仲包括以前無倚賴前女友生活嘅前科先好!

4.社交生活……

由於你哋有共同的家,但又有各自的家人同朋友,有時自己的家人或朋友來訪,要事先同對方講,並得到對方嘅同意,盡量唔好侵犯到對方嘅私人空間。

好多人開始同居生活後,同朋友間的距離自自然然拉遠了,亦比較容易懶於維繫友情,漸漸疏於參加朋友的gathering。呢種情況好唔健康。千祈唔好忘記健康的生活需要各方面的平衡,況且將重心太側重於男友身上,會令佢透唔到氣。

你要諗吓你同男友的朋友可以建立良好的關係嗎?對男人來說,兄弟情好重要,如果你本身已討厭佢嘅朋友,咁一齊住時只會令關係越來越衰,試諗吓當佢招呼朋友上來睇波時,屋企有個呢埋喺房裏面連招呼都唔打一個兼黑面的女友,點會令男友唔懷疑當初同居的決定係咪錯?

5.難分難捨……

點解話同居同婚姻好接近?其中一點係因為分手唔可以咁灑脫,起碼你或對方要搬走自己嘅東西,並唔係一朝一夕,打個電話、send個WhatsApp話分手就OK,而且共同擁有嘅嘢都要分配返。

假如雙方對將來的想法一致,例如結婚或唔結婚,咁就無咩問題。但如果其中一方想法唔同,另一方就會感到壓力,呢種潛藏嘅精神負擔,可以對感情造成很大傷害。尤其係男人,好多時同居咗,都未必將呢段關係睇得好serious!

同居往往會成為男人唔計劃結婚嘅擋箭牌,因為反正你哋都已住埋一齊了。如果你係好想結婚的話,一開始就要同佢講清楚了。

LOAD MORE