職場新丁注意!小心辦公室戀愛陷阱!

By COSMO

啱啱畢業出嚟社會工作,除咗要注意自己嘅工作態度、同同事溝通嘅技巧、掌握公司文化等之外,仲有一件事十分重要──就係要小心處理辦公室戀愛事宜。

別誤墜情網

好多初出茅廬嘅天真女生,往往都好容易喺未認清對方為人之前,就跌入「愛上」經驗較自己豐富嘅男同事嘅陷阱,而又唔知其實對方已經有女友甚至已婚,唔小心成為第三者。一般嚟講,呢種情況嘅原因有幾個:

-「仰慕」對方好似乜都識。

-初來埗到,內心一定誠惶誠恐,有人對自己友善少少,就好似喺茫茫大海遇到水泡。

-喺學校一直接觸同自己年紀差不多嘅男生,當遇上較為成熟嘅男人,比較之下,成熟男士就會顯得分外有吸引力。

其實只要保持頭腦清醒,你就會發現:

-對方好似乜都掂,其實係因為作為新人嘅你無工作經驗,乜都唔識。

-只要你將工作好好做落去,過多一、兩年,你同呢啲熟男可能已經可以平起平坐,完全唔值得你「仰慕」。

-真正有料嘅人,係唔需要喺新丁面前炫耀自己嘅成就。



自我提醒

新丁女生面對花花世界,只要不時提醒自己幾個重點,就唔會迷失!

-你加入公司工作係想吸取工作經驗,而唔係吃喝玩樂識男仔。

-雖然辦公室戀愛無對或錯,不過公司原本係想請你返嚟做嘢,而唔包提供「有緣人」服務。

-學校同學起碼日日一齊上堂,一見就見足幾年,比較容易了解對方背景,而喺職場上新認識嘅男生,你所能掌握嘅資料較為有限,所以一定要帶眼識人,深入了解先開始交往。



考慮後果

亂搞辦公室戀愛,並唔係講玩,後果可大可小,隨時斷送你美好嘅前途。

-如果你不幸搭上咗有老婆/女友嘅男同事,事情被傳開去,你水洗都唔清!

-如果你嘅辦公室戀情混亂,例如繼同阿A和阿B分手後,又搭上咗阿C,你應該好難俾人一種可信賴嘅形象,想升職都幾難。

-女同事對呢方面嘅事特別敏感,被標籤為「隨便」、「發姣」,好難唔乞人憎,得罪女同事,通常都無運行。

LOAD MORE