8點即check佢係咪好男友!

By COSMO

佢靚仔又有型,係咪就等於佢係一個好男友?到底要點先知佢係咪值得你愛,以下有8大法則,讓你睇清佢究竟係咪適合你!

1. 從旁入手

觀察佢所識嘅朋友。古語有云:「近朱者赤,近墨者黑」,如果佢啲friend心地都好好,對女仔細心又體貼,相信佢都唔會差得去邊。如果佢身邊全部都係一啲無嚟正經嘅豬朋狗友,你就要小心啲喇。

2. 愛你所愛

想知道呢個男生係咪鍾意你,係咪在乎你嘅感受,可以同佢傾多啲你鍾意嘅話題,例如「余文樂做戲真係好好睇,又靚仔!」,睇吓佢會唔會將話題接落去。一個男生就算同你志趣有幾唔同,倘若佢真係鍾意你,就一定會想了解你多啲,包括興趣同嗜好。佢會同你傾你有興趣嘅話題,而唔係只講佢自己嘅嘢,完全唔理你感受。

3. 傾心事

留意佢心情唔好時,譬如輸咗波或者工作遇上困難時,會唔會向你傾訴心事。如果佢肯同你表露心事,即係表示佢願意同你分擔煩惱,係好嘅預兆。

4. 追查戀愛史

如果佢曾經一腳踏兩船,或者聽講佢好花心,咁你就要小心啲。既然佢可以對前任女友不忠,今日一樣可以咁對你,唔好以為佢會因為你而改變。雖則話人誰無過,但喺完全信任佢之前,最好俾多啲時間去觀察佢。

5. 佢係咪玩玩吓

仲未正式拍拖時,必須肯定佢可以成熟地處理你哋嘅感情關係,並將你放喺佢生命中重要嘅位置。呢點可以從佢對人或事嘅認真程度去揣測:佢嘅工作態度認唔認真?有承擔群體工作中領導角色嘅熱誠嗎?呢啲都可以證明佢係可靠、關心他人同樂於助人嘅男生。

6. 個人修養

睇一個人嘅個人修養,從揸車時就最易睇到!當佢揸車俾人爬頭時,會唔會因此而破口大罵?如果佢唔會,就代表呢個人夠穩重,識得控制脾氣。如果佢連呢啲小事都按捺不住,佢對住你嘅時候脾氣都唔慌好。

7. 識得分享

借嘢俾朋友絕對唔會斤斤計較。朋友問佢借車、借相機,佢都唔會托手踭,咁證明佢為人夠胸襟廣闊。

8. 有無耐性

佢等朋友或者排隊俾錢時,會唔會表現得好唔耐煩?唔好睇小呢一點,其實咁係可以睇得出佢對女朋友有無耐性!例如當佢想同你親熱,但你又唔想,如果佢係有耐性、忍耐力強嘅人,一定會識得尊重你。

LOAD MORE